టిక్‌టాక్ తో కామెడీ పండించ‌నున్న మారుతి

మారుతి సినిమాలో హీరోలు విచిత్రంగా క‌నిపిస్తుంటారు. భ‌లే భ‌లే మ‌గాడివోయ్ లో నానికి మ‌తిమ‌రుపు. మ‌హానుభావుడులో శ‌ర్వానంద్‌కి అతి శుభ్ర‌త‌. అయితే ఈసారి హీరోయిన్ క్యారెక్ట‌ర్‌ని వెరైటీగా చూపించాల‌ని ఫిక్స‌య్యాడు మారుతి. సాయిధ‌ర‌మ్ తేజ్ తో మారుతి ఓ సినిమాని తెర‌కెక్కిస్తున్న సంగతి తెలిసిందే. గీతా ఆర్ట్స్ నిర్మిస్తోంది. ఈ చిత్రం కోసం `ప్ర‌తి రోజూ పండ‌గే`, `భోగి` లాంటి పేర్లు ప‌రిశీల‌న‌లో ఉన్నాయి. ఈ నెలాఖ‌రున షూటింగ్ ప్రారంభం కానుంది. ఈ సినిమాలో నాయిక పాత్ర‌కూ ప్రాధాన్యం ఉంది. కథానాయిక‌ని కేవ‌లం గ్లామ‌ర్ కోసం వాడుకోకుండా, ఆ పాత్ర‌తో కావ‌ల్సినంత వినోదం పండించ‌డానికి ఫిక్స‌య్యాడు మారుతి. ఇటీవ‌ల టిక్ టాక్ చాలా పాపుల‌ర్ అయిపోయింది. టిక్ టాక్ వీడియోల‌తో సోష‌ల్ మీడియా వెర్రెత్తిపోతోంది. ఈ సినిమాలో క‌థానాయిక‌కీ హాబీ కూడా అదేన‌ట‌. ఆ టిక్ టాక్ చుట్టూనే మారుతి వినోదం పండించ‌బోతున్నాడ‌ని తెలుస్తోంది. క‌థానాయిక‌లుగా నిధి అగ‌ర్వాల్‌, రుక్సార్ పేర్లు ప‌రిశీల‌న‌లో ఉన్నాయి. వీళ్ల‌లో ఎవ‌రు ఫిక్స‌వుతారో చూడాలి.