రాజకీయాల్లో పైకి ఎంత గంభీరంగా కనిపిస్తున్నప్పటికీ.. కాపు ఉద్యమాన్ని ఉధృతంగా నడిపించడానికి తన పూర్తి మద్దతును ప్రకటిస్తూ.. చంద్రబాబునాయుడు సర్కారును ఇబ్బందుల పాల్జేయడానికి తన వంతు కృషిచేస్తున్నప్పటికీ… మరోవైపు ప్రతిపక్ష నేత వైఎస్‌ జగన్మోహనరెడ్డి తాను వ్యక్తిగతంగా విపరీతమైన టెన్షన్‌ల మధ్య గడుపుతున్నారా? తన మీద ఉన్న ఆర్థిక నేరాల కేసులు ఆయనకు ఊపిరి సలపనివ్వకుండా ఇబ్బంది పెడుతున్నాయా? ప్రస్తుత వాతావరణం చూస్తే అలాగే కనిపిస్తోంది.
రాష్ట్రంలో ప్రస్తుతం రాజుకుని ఉన్న కుల రాజకీయ వాతావరణం వేడి దృష్ట్యా అంతగా మన దృష్టి పడడం లేదు గానీ.. వైఎస్‌ జగన్మోహనరెడ్డి మీద విచారణలో ఉన్న ఆర్థిక అక్రమాల కేసులు మరోవైపు చురుగ్గా కదులుతున్నాయి. ఇటీవల ఆయన ఎన్‌ఫోర్స్‌మెంట్‌ డైరక్టరేట్‌ (ఈడీ) వారి విచారణ నిమిత్తం ఢిల్లీ వెళ్లి వచ్చిన సంగతి తెలిసిందే. అయితే ఈడీ విచారణ జగన్‌కు చాలా ఇబ్బందికరంగా మారినట్లుగా పలువురు విశ్లేషిస్తున్నారు.
ప్రస్తుతం సీబీఐ దాఖలు చేసిన కేసులన్నీ సీబీఐ కోర్టులోనే విచారణ జరుగుతున్నాయి. వీటి ఆధారంగా ఈడీ కూడా ఓ కేసు పెట్టింది. ఒకసారి ఈడీ విచారణకు వెళ్లి వచ్చిన తర్వాత.. జగన్ వర్గానికి ఓ ఆలోచన వచ్చింది. ఇక్కడ విచారణలో ఉన్న సీబీఐ కేసులు కొలిక్కివచ్చే దాకా ఈడీ విచారణ ఆపేసేలా స్టే ఇవ్వాలంటూ ఆయన తరఫు న్యాయవాదులు హైకోర్టులో ప్రత్యేకంగా ఓ కేసు వేశారు. దీన్ని బట్టి చూస్తే.. ఈడీ విచారణ సమాంతరంగా సాగితే జగన్ చాలా ఇబ్బంది పడిపోతున్నట్లుగా కనిపిస్తోంది. అయితే వీరి విజ్ఞప్తిని ఈడీ కోర్టు తిరస్కరించింది. ఈ తీర్పును సవాలు చేస్తూ జగన్ కోటరీ మళ్లీ హైకోర్టులో మరో కేసు వేసింది. మహా మహా 2జీ కేసులోనే సీబీఐ విచారణ, ఈడీ విచారణ రెండూ ఏకకాలంలో జరుగుతూ ఉండగా, జగన్ ఆర్థిక నేరాల కేసులో సీబీఐ విచారణ పూర్తయ్యేవరకు ఈడీ విచారణను ఎందుకు ఆపివేయాలంటూ న్యాయమూర్తులు ప్రశ్నించడం విశేషం. కావాలంటే సీబీఐ కేసును కూడా ఈడీ కోర్టుకు బదిలే చేసేయాల్సిందిగా ఆదేశాలు ఇస్తాం.. మీకు ఇబ్బంది లేకుండా అన్నీ ఒకే చోట తేల్చుకోండి అన్నట్లుగా కోర్టు చెప్పేసరికి జగన్ న్యాయవాదులు కంగారుపడిపోయారు. అలా వద్దంటూ జగన్ న్యాయవాదులు కోర్టుకు అభ్యంతరం చెప్పడాన్ని బట్టి చూస్తోంటే.. ఈడీ విచారణతో జగన్ చాలా ఇబ్బంది పడుతున్నారని అర్థమవుతోంది.
ప్రస్తుతానికి ఇలా సీబీఐ కేసును ఈడీ కోర్టుకు మార్చడానికి ఈడీ వారి న్యాయవాది అభిప్రాయం కోసం కోర్టు వాయిదా వేసి ఉంది. వారి వాదన విన్న తర్వాత.. అదే తరహాలో హైకోర్టు నిర్ణయం తీసుకుంటే గనుక.. జగన్ పూర్తిగా ఇరుక్కుపోయినట్లే అని పలువురు భావిస్తున్నారు.
