ఎవరైనా ప్రభుత్వ రంగంలో ఏదైనా కాంట్రాక్ట్ వస్తుందంటే కళ్లకు అద్దుకుని తీసుకుంటారు. అలాంటి కాంట్రాక్టుల కోసం పైరవీలు చేస్తూంటారు. తృణమో..పణమో సమర్పించకుంటామని.. ఆశ పెడుతూంటారు. ఎక్కువగా…కాంట్రాక్ట్ పనులు… అధికార పార్టీ ద్వితీయ శ్రేణి నేతలకు లేదా… అగ్రనేతల బినామీలే చేస్తూంటారు. అయితే ఇప్పుడు పరిస్థితి మారిపోయింది. ముఖ్యంగా ఏపీలో అయితే రివర్స్ అయిపోయింది. కాంట్రాక్టులు ఇస్తామంటే… ఎవరూ ముందుకు రావడం లేదు. వద్దంటే వద్దంటున్నారు. అధికారులు సమావేశాలు పెట్టి…టీ కాఫీలు ఇచ్చి.. బుజ్జగించి.. బతిమాలి.. బామాలి… చెప్పినా… ఇంకేమైనా చెప్పండి కానీ.. కాంట్రాక్టులు మాత్రం తీసుకోమని అంటున్నారు.
ప్రస్తుతం ఆంధ్రప్రదేశ్‌లో రోడ్లు అధ్వాన్న స్థితికి చేరాయి. ప్రభుత్వం వద్ద నిధుల్లేవు. దీంతో అప్పులుతీసుకుని రోడ్లు బాగు చేయాలని పరిపాలనా అనుమతులు మంజూరు చేసింది. దీనికి అధికారులు టెండర్లు పిలిచారు. కానీ కాంట్రాక్టర్లు ముందుకు వస్తేగా..?. ముఖ్యమంత్రి సొంత జిల్లా కడపలో ఓ ఎనభై శాతం పనులకు మాత్రం కాంట్రాక్టర్లు టెండర్లు వేశారు. ఇతర చోట్లా ఎక్కడా పది శాతానికంటే ఎక్కువగా వేయలేదు. దీనికి ప్రత్యేకంగా కారణం చెప్పాల్సిన పని లేదు. డబ్బులు ఇస్తుందని ప్రభుత్వంపై నమ్మకం లేదు. డబ్బులు ఇవ్వని దానికి తాము పెట్టుబడి పెట్టి ప్రభుత్వం చుట్టూ తిరగడం… అందరికీ కమిషన్లు ఇచ్చుకోవడం ఎందుకని మిన్నకుండిపోయారు. అందుకే ప్రభుత్వం వారి కోసం… నేరుగా బ్యాంకుల నుంచి బిల్లులు చెల్లిస్తామని కొత్త ప్రపోజల్ పెట్టింది. కానీ కాంట్రాక్టర్లు ఆసక్తి చూపించడం లేదు.
నిజానికి వారికి పాత బకాయిలు చాలా రావాల్సి ఉంది. వాటి గురించి ప్రభుత్వం చెప్పడం లేదు. గతంలో చేసిన పనులకు డబ్బులు ఇవ్వకుండా ఇప్పుడు కొత్త పనులు చేయమంటే ఎలా అని అధికారుల్ని నిలదీస్తున్నారు. వీటికి అధికారులు సమాధానం చెప్పలేకపోతున్నారు. గత ప్రభుత్వంలో చేసిన పనులకు తాము బిల్లులు ఇవ్వబోమని ప్రభుత్వం భీష్మించుకుని కూర్చుకుంది. రెండేళ్లుగా అటు ఉపాధి హామీ దగ్గర్నుంచి ఇటు రోడ్ల పనులు చేసిన వారికీ బిల్లులు చెల్లించడం లేదు. ఫలితంగా ప్రభుత్వంపై కాంట్రాక్టర్లు విశ్వాసం కోల్పోయిన పరిస్థితి ఏర్పడింది.
