వైఎస్ఆర్ కాంగ్రెస్ పార్టీలో రెండున్నరేళ్ల అంశం ప్రతి ఒక్కరి మదిలో మెదులుతోంది. ప్రస్తుతం ఉన్న మంత్రివర్గంలో 90 శాతం మందిని రెండున్నరేళ్ల తర్వాత తీసేసి కొత్త వారికి చాన్సిస్తామని సీఎం జగన్ పదవి చేపట్టినప్పుడే ప్రకటించారు. దీంతో రెండున్నరళ్ల సమయం దగ్గర పడుతోంది. ఈ కారణంలో.. ఎవరెవరి పదవులు పోతాయి.. కొత్తగా ఎవరెవరికి దక్కుతాయి అన్న అంశంపై వైసీపీలో అంతర్గతంగా విస్తృతమైన చర్చ జరుగుతోంది. ఈ క్రమంలో పదవులు నిలబెట్టుకోవాలనుకునేవారు.. కొత్తగా పదవులు పొందాలనుకునేవారు పెద్ద ఎత్తున తమ ప్రయత్నాలు తాము చేసుకుంటున్నారు.
ప్రయత్నాలంటే… గాడ్ ఫాదర్లను ప్రసన్నం చేసుకోవడం కాదు. వైసీపీలో గాడ్ ఫాదర్లు అంటూ ఎవరు ఉండరు. ఉండేది ఒక్క జగన్మోహన్ రెడ్డే. ఆయనను ప్రసన్నం చేసుకోవడానికి ఇప్పుడు.. అవకాశం కోసం ఎదురు చూస్తున్న వారంతా పోటీ పడుతున్నారు. ఒకరిని మించి ఒకరు పొగడ్తల వర్షం కురిపిస్తున్నారు. ఒకరు ముఫ్పై ఏళ్ల పాటు జగన్ సీఎంగా ఉంటారని పొడిగితే.. మరొకరు ప్రధానమంత్రి అవుతారని.. కితాబిస్తున్నారు. ఇక.. ఏపీకి జగన్ ఏం చేశారో.. ఎంత అద్భుతమైన పాలన అందించారో మరికొంత మంది చెప్పుకొస్తున్నారు. పొడగ్తల విషయంలో కొంత మందికి ఇప్పటికే జగన్మోహన్ రెడ్డి నుంచి ప్రశంసలు వచ్చాయి.
సాక్షాత్తూ అసెంబ్లీలో రఘురామకృష్ణరాజును అన్‌ పార్లమెంటరీ లాంగ్వేజ్‌లో తిట్టిన పెడన ఎమ్మెల్యేకు జగన్ ప్రశంసలు ఇచ్చారు. దీంతో ఆయనకు అదే పెద్ద సర్టిఫికెట్ అయిపోయింది. జగన్‌కు ఎలాంటి విమర్శలు .. పొగడ్తలు ఇష్టమో తెలుసు కాబట్టి.. ఆ దిశగా అందరూ ప్రయత్నాలు చేస్తున్నారు. ఈ రేసు ముందు ముందు మరింత జోరుగా సాగే అవకాశం ఉంది. త్వరలో ఈ పొగడ్తులు ఎవరూ ఊహించని స్థాయికి చేరే చాన్స్ కనిపిస్తోంది.
