బలవంతపు మత మార్పిళ్లను అడ్డుకునేందుకు అనేక రాష్ట్రాలు కొత్తగా చట్టాలను తీసుకు వస్తున్నాయి. తాజాగా ఏపీ పొరుగు రాష్ట్రం కర్ణాటకలో అలాంటి చట్టాన్నే అసెంబ్లీ ఆమోదించింది. మత మార్పిళ్లను అడ్డుకునేందుకు కఠినమైన చట్టాన్ని తీసుకురావాల్సిన అవసరముందని చట్టాలు చేసిన ప్రభుత్వాలు నొక్కి చెప్పాయి. ఒడిశా మధ్యప్రదేశ్, ఛత్తీస్‌గఢ్, హిమాచల్ ప్రదేశ్, గుజరాత్, తమిళనాడు, ఝార్ఖండ్, ఉత్తరాఖండ్‌లలో ఈ మత మార్పిడి వ్యతిరేక చట్టాలున్నాయి. ఈ జాబితాలో కర్ణాటక చేరింది. మరికొన్ని రాష్ట్రాలు ఈ తరహా చట్టాలు తెచ్చే ప్రయత్నంలో ఉన్నాయి. అయితే అన్ని రాష్ట్రాల్లో చట్టాల్లో ఒకే రకమైన నిబంధనలు లేవు. చాలా రాష్ట్రాల్లోని గిరిజన ప్రాంతాల్లో గిరిజనులను క్రైస్తవంలోకి మారుస్తున్నారని ఆరోపణలు ఉన్నాయి.
అదే సమయంలో హిందూ అమ్మాయిలను పెళ్లిళ్ల ద్వారా ఇస్లాంలోకి మారుస్తున్నారని ఆరోపణలు వస్తున్నాయి. ఈ కారణంగా .. ఎవరి ప్రభావం ఎక్కువ ఉందో.. ఆయా రాష్ట్రాల్లో వారికి వ్యతిరేకంగా నిబంధనలు పెడుతున్నారు. ఆంధ్రప్రదేశ్‌లో మత మార్పిడుల అంశం ఇటీవల వివాదాస్పదంగా మారింది. ఏపీలోని గిరిజన నియోజకవర్గాల్లో క్రైస్తవ మిషనరీలు పెద్ద ఎత్తున మత మార్పిళ్లకు పాల్పడ్డాయని ఇప్పటికే అనేక నివేదికలు తేల్చాయి. ఇప్పుడు కొత్తగా గ్రామాల్లోనూ.. పట్టణాల్లోనూ మత మార్పిళ్లకు పాల్పడుతున్నారని అనేక ఆరోపణలు కేంద్రానికి వెళ్లాయి. నివేదికలు ఇవ్వాలని కేంద్రం నుంచి ఏపీ ప్రభుత్వానికి ఆదేశాలు వచ్చినా పట్టించుకోలేదు.
ఇలాంటి సమయంలో ఏపీలోనూ మత మార్పిడి నిరోధక చట్టం అవసరం ఉందన్న వాదన వినిపిస్తోంది. ప్రలోభాలు ఆశ పెట్టి.. లేకపోతే మరో కారణంతోనో మత మార్పిడి చేపడితే శిక్ష విధించాలన్న వాదన వినిపిస్తోంది. అయితే ఏపీలో ప్రస్తుతం ఉన్న ప్రభుత్వం అలాంటి ఆలోచన చేసే అవకాశం లేదు. ఎందుకంటే మత మార్పిళ్లకు ఏపీ ప్రభుత్వ ప్రోత్సాహం ఉందన్న అభిప్రాయం బలంగా ఉండటమే కారణం.
