ఈడీ నోటీసుల విషయంలో కవిత ధైర్యంగా విచారణకు హాజరవుతుందని బీఎల్ సంతోష్ లాగా కోర్టుకెళ్లదని ఘనంగా ప్రకటించుకున్నారు బీఆర్ఎస్ నేతలు. అయితే ఆ సవాళ్లు ఎక్కువ రోజులు నిలబడలేదు. రెండో సారి విచారణకు పిలిచే సరికి కవిత కూడా హడావుడిగా సుప్రీంకోర్టులో పిటిషన్ వేశారు. ఢిల్లీ లిక్కర్ స్కాం కేసులో విచారణకు హాజరుకావాలని ఈడీ ఇచ్చిన నోటీసులపై స్టే ఇవ్వాలని ఆమె సుప్రీంకోర్టుకువెళ్లారు. నేరుగా సీజేఐ బెంచ్ ముందు ప్రస్తావించారు.
తనకు ఇచ్చిన నోటీసులో ఇతరులతో కలిపి విచారిస్తామన్నారని, కానీ అలా చేయలేదని పిటిషన్‌లో పేర్కొన్నారు. ముందస్తు సమాచారం ఇవ్వకుండానే మొబైల్ సీజ్ చేశారని తెలిపారు. సీఆర్‌పీసీ 160 సెక్షన్‌ ప్రకారం మహిళను తన ఇంట్లోనే విచారించాలని, కానీ ఈడీ కార్యాలయానికి పిలవడంపై అభ్యంతరం వ్యక్తం చేశారు. అయితే మధ్యంతర రిలీఫ్ ఇచ్చేందుకు అత్యున్నత న్యాయస్థానం నిరాకరించింది. ఈ పిటిషన్‌పై ఈనెల 24న విచారణ చేపడతామని చెప్పింది.
ఢిల్లీ లిక్కర్ స్కాం కేసులో కవిత గురువారం మరోసారి ఈడీ ఎదుట హాజరుకానున్నారు. ఈనెల 11న ఈడీ అధికారులు ఆమెను 9 గంటలపాటు విచారించారు. 16న మళ్లీ విచారణకు హాజరుకావాలన్నారు. ఈనేపథ్యంలోనే ఆమె ఈడీ నోటీసులపై స్టే ఇవ్వాలని సుప్రీంను ఆశ్రయించారు. ఢిల్లీ లిక్కర్ స్కాంలో ఇప్పటికే ప్రధాన నిందితులందర్నీ అరెస్ట్ చేశారు. ఒక్క కవిత మాత్రమే బయట ఉన్నారు. అందుకే కవిత అరెస్ట్ పై అనేక రకాల ఊహాగానాలు వినపిస్తున్నాయి.
