కేశినేని నాని, ఆయన కుమార్తె పూర్తిగా వైసీపీ లైన్‌లోనే వెళ్తున్నట్లుగా కనిపిస్తోంది. రోజూ ఏదో ఓ ప్రకటన చేసి.. వైసీపీ మీడియాకు ఫీడ్ అందించే ప్లాన్ ప్రకారమే .. వ్యవహారాలు నడుపుతున్నారు. కేశినేని శ్వేత కార్పొరేటర్ పదవికి రాజీనామా చేయడానికి పెద్ద షో చేశారు. తీరా వెళ్లి మేయర్ కు రాజీనామా లేఖ ఇచ్చారు. అందు కోసం పక్కా ఏర్పాట్లు చేసుకున్నారు. మేయర్ తో పాటు వైసీపీ కార్యకర్తలు, మీడియా సమయానికి తగ్గ ఏర్పాట్లు చేసుకున్నారు. శ్వేత కూడా ముందుగా ఎమ్మెల్యే గద్దె రామ్మోహన్ ఇంటికి వెళ్లి రాజకీయం ప్లే చేశారు. తనకు గద్దె రామ్మోహన్ బీఫాం ఇచ్చారని అందుకే ఆయనను కలవడానికి వెళ్లానని చెప్పుకొచ్చారు.
మరి కేశినేని నాని.. తనకు బీఫాం ఇచ్చిన చంద్రబాబును కలిసి చెబుతారా అన్న ప్రశ్న సాధారణం వస్తుంది. పైగా.. కేశినేని శ్వేత రాజీనామా చేసే సమయంలో పక్కన వైసీపీ కార్పొరేటర్లు ఉన్నారు. ముఖ్యంగా టీడీపీ ఆఫీసుపై దాడి కేసులో ప్రధానంగా ఆరోపణలు ఎదుర్కొంటున్న అరవ సత్యం.. ఆమె వెన్నంటే ఉన్నారు. టీడీపీ ఆఫీసుపై దాడి చేసినప్పుడు కేశినేని నాని కానీ.. శ్వేత కానీ కనీసం స్పందించలేదు. రాజీనామా తర్వాత ఆమె.. తమకు ఏడాదిన్నర నుంచి అవమానాలు జరుగుతున్నాయని చెప్పుకొచ్చారు.
కానీ మూడేళ్ల పాటు వారు చేసిన పనులను చూసిన తర్వాతనే ఇక మారరని పార్టీ పక్కన పెట్టిందని మాత్రం గుర్తించలేకపోయారు. తిరువూరు సభకు ఇంచార్జ్ గా చిన్నిని నియమించినా సన్నాహాక సమావేశానికి వెళ్లి రచ్చ చేశారు. కావాలనే ఈ రాజకీయాలు మొత్తం వైసీపీ వ్యూహం ప్రకారం చేస్తున్నారని అంటున్నారు. సమయం చూసుకుని వారు వైసీపీలో చేరిపోతారని.. విజయవాడ పార్లమెంట్ కు వైసీపీ తరపున కేశినేని నానినే అభ్యర్థిగా ఉంటారని ఇప్పటికే వైసీపీలోనూ చర్చ జరుగుతోంది.
