బాహుబ‌లిపై పుట్టుకొచ్చిన రూమ‌ర్ల‌కు లెక్కలేదు. ప్రతీరోజూ బాహుబ‌లికి సంబంధించి ఓ ఆస‌క్తిక‌ర‌మైన అంశం.. మీడియాకు ఎక్కేది. దాని గురించి రాజ‌మౌళి కూడా స్పందించాల్సివ‌చ్చేది. ‘అదేం లేదు..’ అని రాజ‌మౌళి క్లారిటీ ఇచ్చేంత వ‌ర‌కూ అదే టాపిక్ మీడియాలో.. హాట్ హాట్‌గా తిరిగేది. కొన్నాళ్లకు రాజ‌మౌళి అండ్ టీమ్ కూడా ఇలాంటి గాసిప్పుల్ని ప‌ట్టించుకోవ‌డం మానేసింది. బాహుబ‌లి 2 విష‌యంలోనూ ఆ గాసిప్పుల ప‌రంప‌ర కొన‌సాగుతోంది.
బాహుబ‌లి 2 కి సంబంధించిన లేటెస్ట్ గాసిప్ ఏంటంటే.. ఈ సినిమాలో బాలీవుడ్ భామ దీపికా ప‌దుకొణె న‌టిస్తోంద‌ట. బాహుబ‌లి పార్ట్ 1 హిందీలో అద్భుత‌మైన విజ‌యం సాధించింది. అక్క‌డ వంద కోట్లు వ‌సూలు చేసిన తొలి ద‌క్షిణాది చిత్రంగా నిలిచింది. బాహుబ‌లి 2 గురించి బాలీవుడ్ కూడా ఆస‌క్తిగా ఎదురుచూస్తోంది. ఆక్క‌డి ఆడియన్స్ దృష్టిని మ‌రింత‌గా ఫోక‌స్ చేయించాలంటే బాలీవుడ్ తారల్ని బాహుబ‌లి 2లోకి తీసుకురావ‌ల్సిందే అని రాజ‌మౌళి భావిస్తున్నార‌ని, అందుకే దీపిక‌ని సంప్ర‌దించార‌ని, బాహుబ‌లి అన‌గానే మ‌రో మాట‌కు తావు లేకుండా దీపికా ఒప్పేసుకొంద‌ని గుస‌గుస‌లు వినిపిస్తున్నాయి. మ‌రి వీటిపై రాజ‌మౌళి అండ్ టీమ్ స్పందిస్తుందా, లేదా?? ఇది కూడా గాసిప్పేనా, ఇందులో నిజాలేమైనా ఉన్నాయా?? అనే క్లారిటీ రావాలంటే ఇంకొన్నిరోజులు ఆగాలి.
