నంద‌మూరి బాల‌కృష్ణ వందో చిత్రం గౌత‌మిపుత్ర శాత‌క‌ర్ణి అంగ‌రంగ‌వైభ‌వంగా ప్రారంభ‌మైంది. సినీ, రాజ‌కీయ పెద్ద‌లొచ్చి… బాల‌య్య‌ను దీవించి వెళ్లారు. సిల్వ‌ర్ జూబ్లీ ఆడాల‌ని మ‌న‌సారా కోరుకొన్నారు. ఇక అంద‌రి చూపూ ఈ సినిమా ఎప్పుడొస్తుంద‌నేదానిపైనే కేంద్రీకృతం అయ్యింది. ఇప్పుడు రెగ్యులర్ షూటింగ్ డేట్ కూడా ఫిక్స‌యిపోయింది. మే 9 నుంచి షూటింగ్‌ప్రారంభిస్తారు. తొలి షెడ్యూల్ ప‌ది హేనురోజుల పాటు జ‌ర‌గ‌బోతోంది. అంతా బాగానే ఉందిగానీ.. హీరోయిన్ మాత్ర‌మే సెట్ కావ‌డం లేదు. తొలి షెడ్యూల్‌ని హీరోయిన్ లేకుండానే ప్రారంభించేస్తున్నారు. నిజానికి హీరోయిన్ డేడ్స్ జూన్‌, జులైల‌లో కావాలి. న‌య‌న‌తార‌కు ఆ టైమ్ లో అస్సలు ఖాళీ లేద‌ట. అందుకే.. ‘నో’ చెప్పింద‌ని సమాచారం.
పోనీ న‌య‌న‌కోసం రెండు నెల‌లు ఆగుదామంటే ఆ ప‌రిస్థితి క‌నిపించ‌డం లేదు. దాంతో.. చిత్ర‌బృందం ఆలోచ‌న‌లో ప‌డింది. న‌య‌న‌ను భ‌ర్తీ చేసే స‌త్తా.. ప్ర‌స్తుతం ఉన్న ఏ క‌థానాయిక‌కూ లేద‌న్న‌ది బాల‌య్య అభిప్రాయ‌మ‌ట. మ‌రి.. న‌య‌న‌ని ఎలా ఒప్పిస్తారో, ఈ సినిమాలో ఎలా తీసుకొస్తారో అన్న‌ది ఆస‌క్తిగా మారింది. 2017 సంక్రాంతికి ఈ సినిమాని ప్రేక్ష‌కుల ముందుకు తీసుకురావాల‌న్న‌ది క్రిష్ ఉద్దేశం. అందుకే.. హీరోయిన్ గురించి అట్టేకాలం వేచి చూడ‌డం మంచిది కాద‌ని భావిస్తున్నార‌ట. మ‌రి ఈ హీరోయిన్ స‌మ‌స్య ఎప్పుడు, ఎలా, ఎవ‌రితో తీరుతుందో చూడాలి
