స‌రైనోడు బాక్సాఫీసు ద‌గ్గ‌ర ఊహించిన‌ట్టుగానే దూసుకుపోతున్నాడు. రేసుగుర్రం రికార్డుల్ని బ‌ద్ద‌లుకొట్టే అవ‌కాశం ఉంద‌ని ట్రేడ్ నిపుణులు లెక్క‌లుగ‌డుతున్నారు. ఈ విజ‌యం ఇచ్చిన కిక్‌లోనే మ‌రుస‌టి సినిమా కూడా మొద‌లెట్టేద్దాం అనుకొంటున్నాడు బన్నీ. స‌రైనోడు త‌ర‌వాత విక్ర‌మ్ కె.కుమార్ ద‌ర్శక‌త్వంలో బన్నీ ఓ సినిమా చేయాల్సివుంది. 24 సినిమా పోస్ట్ ప్రొడ‌క్ష‌న్స్ ప‌నుల్లో బిజీగా ఉన్నాడు విక్ర‌మ్ కుమార్. ఆ త‌ర‌వాత బన్నీ సినిమాని టేక‌ప్ చేస్తాడ‌నుకొన‌న్ఆరు. అయితే.. ఇప్పుడు బన్నీ గేమ్ ప్లాన్ మారిన‌ట్టు తెలుస్తోంది. విక్ర‌మ్ సినిమాని ప‌క్క‌నెట్టి, మరో సినిమాని మొద‌లెట్టే ఆలోచ‌న‌లో ఉన్నాడు బన్నీ.
విక్ర‌మ్ కె.కుమార్‌ది కాస్త విల‌క్ష‌ణ‌మైన శైలి. సాధార‌ణంగా ఓ సినిమా అయిపోయిన వెంట‌నే మరో సినిమా ప‌నిలో ప‌డిపోవ‌డం విక్ర‌మ్ కు అల‌వాటు లేదు. క‌థ‌పై బాగా క‌స‌ర‌త్తు చేసి, స్ర్కిప్ట్‌పై పూర్తిగా ప‌ట్టు సాధించిన త‌ర‌వాతే సినిమాని ప‌ట్టాలెక్కిస్తాడు. బన్నీ క‌థ కోసం విక్ర‌మ్ మ‌రింత స‌మ‌యం కావాల‌ని చెప్పాడ‌ట. న‌వంబ‌రులోగానీ సినిమా మొద‌లెట్టే అవ‌కాశాలు లేవ‌ని స్ప‌ష్టం చేశాడ‌ట. ఈలోగా ఖాళీగా ఉండ‌డం ఎందుకు అని మరో సినిమా మొద‌లెడ‌దామ‌నుకొంటున్నాడు బన్నీ. నాలుగు నెల‌ల్లో పూర్త‌య్యే స్ర్కిప్టు కోసం బన్నీ ఎదురుచూస్తున్నాడ‌ని టాక్. యువ ద‌ర్శ‌కుల‌కు బన్నీ అవ‌కాశం ఇవ్వొచ్చ‌ని, అందుకోసం క‌థ‌లూ వింటున్నాడ‌ని తెలుస్తోంది. మ‌రి.. బన్నీ ఎవ‌రి క‌థ‌కు ఓకే చెప్తాడో చూడాలి.
