అమరావతి విషయంలో వైసీపీ స్ట్రాటజీ ఒక్కటే . అక్కడేమీ జరగడం లేదని చెప్పడం. అమరావతిలో ఇప్పటికే సీఆర్డీఏ బిల్డింగ్ ప్రారంభమయింది. పది నుంచి పన్నెండు వేల మంది కార్మికులు మూడు షిఫ్టుల్లో అన్ని ప్రాజెక్టుల్లో పని చేస్తున్నారు. అనేక యూట్యూబ్ చానళ్లు రెగ్యులర్ గా అక్కడి నిర్మాణ పనుల్ని.. రోజుల్లో కనిపిస్తున్న మార్పును ప్రజల ముందు ఉంచుతున్నాయి. అయినా సరే.. వైసీపీ నేతలు అక్కడేమీ జరగడం లేదని చెప్పడానికి ప్రాధాన్యం ఇస్తున్నారు.
రెండో దశ ల్యాండ్ పూలింగ్ విషయంలో రైతుల్నిరెచ్చగొట్టేందుకు వైసీపీ అంబటి రాంబాబును రంగంలోకి దింపింది. ప్రస్తుతం వైసీపీకి ఆయన తప్ప ఇంకెవరూ దిక్కు లేదు. ఆయన మాట్లాడితే ఎంత విలువ ఉంటుందో తెలిసినా .. గుంటూరుజిల్లాకు చెందిన నేత కాబట్టి ఆయనతోనే అమరావతికి వ్యతిరేకంగా మాట్లాడించాలని రంగంలోకి దింపారు. కాంట్రాక్టర్లకు అడ్వాన్సులు చెల్లించారు కానీ పని ప్రారంభం కాలేదని అనేశారు. పద్దెనిమిది నెలల్లో తట్ట మట్టి కూడా పోయలేదని అసువుగా అనేశారు.
జగన్ రెడ్డి ఐదేళ్ల పాటు పెంచిన పిచ్చిమొక్కల్ని తీసేయడానికే మూడు నెలలు పట్టింది. ఇక చేసిన విధ్వంసాలను.. తెచ్చిపెట్టిపోయిన న్యాయపరమైన చిక్కులు, పాత కాంట్రాక్టర్ల బిల్లులు సెటిల్ చేసి కొత్తగా కాంట్రాక్టులు ఇవ్వడానికి సమయం పట్టింది. అయినా ఇప్పుడు జోరుగా పనులు సాగుతున్నాయి. ఇవన్నీ ప్రజలకు తెలియవన్నట్లుగా అంబటి అడ్డగోలుగా మాట్లాడుతున్నారు. ఏపీకి ప్రపంచ స్థాయి రాజధాని అవసరం లేదని కూడా అంటున్నారు. అమరావతిపై వైసీపీ ట్రాప్ లో ఇక రైతులు పడే అవకాశం ఉండదు. అందుకే అంబటి.. అడ్డగోలుగా అబద్దాలు చెప్పేస్తున్నారు.
