అవ‌స‌రాల శ్రీ‌నివాస్ న‌టించిన తాజా చిత్రం ‘బాబు బాగా బిజీ’ ఇప్పుడు ఇబ్బందుల్లో ప‌డింది. అడ‌ల్ట్ కంటెంట్ ఉన్న కార‌ణంగా ఈ సినిమాని సెన్సార్ చేయ‌డానికి ప్రాంతీయ సెన్సార్ బోర్డు నిరాక‌రిస్తోంద‌ని స‌మాచారం. బాలీవుడ్‌లో సెక్సీ సినిమాగా పేరొందిన `హంట‌ర్‌`కి రీమేక్ ఇది. మాతృక‌లోనే అడ‌ల్ట్ కంటెంట్ భారీ స్థాయిలో ఉంటుంది. రీమేక్ లో ఆ డోసు ఇంకాస్త పెరిగింద‌ని తెలుస్తోంది. మ‌రీముఖ్యంగా నాలుగైదు స‌న్నివేశాల ప‌ట్ల సెన్సార్ బోర్డు తీవ్ర అభ్యంత‌రం తెలిపింద‌ని టాక్‌. ఆ స‌న్నివేశాల్ని తొల‌గించ‌డం గానీ, లేదంటే.. బ్ల‌ర్ చేయ‌డం గానీ చేస్తే త‌ప్ప సెన్సార్ అనుమ‌తి వ‌చ్చే అవ‌కాశం లేదు. అందుకే… ఇప్పుడు చిత్ర‌బృందం ఓ ప్లాన్ వేసింది. ఈ సినిమాని ముంబైలో సెన్సార్ చేయాల‌ని నిర్ణ‌యించుకొన్నార్ట.
ముంబైలో సెన్సార్ నిబంధ‌న‌లు కాస్త స‌ర‌ళంగానే ఉంటాయి. బూతు స‌న్నివేశాల్ని కూడా చూసీ చూడ‌నట్టు వ‌దిలేస్తారు. అందుకే వివాదాస్ప‌ద చిత్రాలు, అడ‌ల్ట్ కంటెంట్ ఉన్న సినిమాలూ అక్క‌డ సెన్సార్ జ‌రుపుకొంటాయి. సెన్సార్ నిబంధ‌న‌ల ప్రకారం ఓ సినిమాని ఎక్క‌డైనా సెన్సార్ చేసుకోవొచ్చు. ముంబైలో అయితే.. సెన్సార్ ఈజీగా అయిపోతుంద‌ని. `ఏ` స‌ర్టిఫికెట్‌తో, క‌టింగులేమీ లేకుండా సినిమాని విడుద‌ల చేసుకోవొచ్చ‌ని చిత్ర‌బృందం భావిస్తోంది. అందుకే ఇప్పుడు సెన్సార్ కోసం ముంబై వెళ్ల‌బోతున్నాడు ఈ బాబు. సో… బాబు గారి క‌ష్టాల‌న్నీ తొల‌గిపోయిన‌ట్టే.
