హైదరాబాద్: టైటిల్స్‌లోనే విలక్షణతను ప్రదర్శించి ఆకట్టుకునే దర్శకుడు పూరి జగన్నాథ్. బద్రితో ప్రస్థానాన్ని ప్రారంభించిన పూరి, తర్వాత ‘ఇట్లు శ్రావణి సుబ్రహ్మణ్యం’, ‘అమ్మ నాన్న తమిళమ్మాయి’, ‘కెమేరామేన్ గంగతో రాంబాబు’, ‘ఇద్దరమ్మాయిలతో’ వంటి విలక్షణ టైటిల్స్ పెట్టటమే కాకుండా మంచి విజయాలనుకూడా సాధించారు. ఆయన తిట్లతో కూడా ‘ఇడియట్’, ‘పోకిరి’, ‘దేశముదురు’ అనే ఒక సిరీస్ తీశారు. ఆ కోవలోనే ప్రస్తుతం లోఫర్(నిర్మాణంలో ఉంది) అనే ఒక చిత్రాన్ని నిర్మిస్తుండగా ఇప్పుడు మరొక చిత్రాన్ని ప్రకటించారు. నూతన నటుడు ఇషాన్‌ను పరిచయం చేస్తూ తీయబోతున్న చిత్రానికి ‘రోగ్’ అనే టైటిల్ పెట్టినట్లు ప్రకటించారు. ఈ కొత్త హీరో కన్నడ నిర్మాత, నటుడు సీఆర్ మనోహర్ కుమారుడు కావటం విశేషం.
వాస్తవానికి ఈ రోగ్ చిత్రాన్ని పోకిరి చిత్రానికి సీక్వెల్‌గా మహేష్ బాబుతో తీస్తారని గతంలో వార్తలొచ్చాయి. మహేష్‌తో ఒక చిత్రం తీయబోతున్నట్లు పూరి ఇటీవల ప్రకటించారుకూడా. అయితే చిరంజీవిలాగానే మహేష్ కూడా పూరికి హేండ్ ఇచ్చినట్లున్నాడు. అందుకనే కొత్తనటుడిని లాంచ్ చేసే చిత్రానికి రోగ్ అని పేరు పెట్టేశారు.
