ఆమిర్ ఖాన్ కి కొన్నాళ్ళుగా విజయాలు లేవు. దీనికి చాలా కారణాలు వున్నాయి. ఆమిర్ ట్రెండ్ తో సంబంధం లేకుండా సినిమాలు చేసే నటుడు. ఆయనకి ఎమోషనల్ కనెక్ట్ అయ్యే కథలని చెప్పాలని ప్రయత్నం చేస్తుంటాడు. లగాన్, తారే జమీన్ పర్, దంగల్ అలా వచ్చిన సినిమాలే. ఈ సినిమాలన్నిటికీ ఆయనే నిర్మాత.

అయితే కాయిన్ కి మరో సైడ్ కూడా వుంది. ఆయన నిర్మించే సినిమాలే ఆయన కెరీర్ కి ప్రతిబంధకాలుగా నిలిచాయి. ఒకే కథతో చాలా కాలం వుండిపోవడం, ప్రొడక్షన్ పనులు కారణంగా ఇతర కథలపై దృష్టి పెట్టకపోడం, ఈ క్రమంలో సినీ పరిశ్రమలో, ప్రేక్షకులలో వచ్చిన మార్పులని అందుకోకపోవడం స్పష్టంగా కనిపించింది.

అన్నిటికి మించి ‘లాగ్ సింగ్ చద్దా’ సినిమా అమిర్ ని మానసికంగా ఆర్ధికంగా పెద్ద దెబ్బకొట్టింది. కోట్ల రూపాయిలు ఖర్చు చేసి తీసిన సినిమా ఇది. ఫారెస్ట్ గంప్ రీమేక్ రైట్స్ ని తీసుకొని మరీ చేశారు. తీరా సినిమా డిజాస్టర్. ఈ దెబ్బకి ఇక సినిమాలే వద్దు అనుకునే పరిస్థితి అమిర్ లో వచ్చింది. చాలా గ్యాప్ తర్వాత సితారే జమీన్ పర్ తో వచ్చారు. ఈ సినిమా కూడా ఆశించిన స్థాయిలో రాణించలేదు.

తన కెరీర్ ని పరిశీలించుకున్న అమిర్ ఒక కీలక నిర్ణయం తీసుకున్నారు. ఇక సినిమా నిర్మాణానికి దూరంగా వుండబోతున్నట్లు ప్రకటించారు. నిర్మాతగా కాకుండా పూర్తిగా నటనకే అంకితం కావాలని నిర్ణయించుకున్నారు. 56వ ఇంటర్నేషనల్‌ ఫిల్మ్‌ ఫెస్టివల్‌ ఆఫ్‌ ఇండియా ముగింపు వేడుకలో ఈ స్టేట్మెంట్ ఇచ్చారు.

తనకు నచ్చిన కథలు చెప్పొచ్చనే ఉద్దేశంతో నిర్మాణంలోకి వచ్చారు అమిర్. కాకపోతే నిర్మాణంలోనే వుంటే నటుడిగా కెరీర్ గాడిలో పడదని భావించారేమో.. ఇప్పుడు మనసు మార్చుకున్నారు. మరి అమిర్ తీసుకున్న ఈ నిర్ణయంతో ఆయన కెరీర్ కి టాప్ గేర్ పడుతుందేమో చూడాలి.