దాదాపుగా మూడేళ్ల నుంచి యూనిఫాం వేసుకునే అవకాశం లేకపోవడంతో ఇబ్బందిగా ఫీలవుతున్న సీనియర్ ఐపీఎస్ అధికారి ఏబీ వెంకటేశ్వరరావు…సుప్రీంకోర్టు తీర్పు తర్వతా నేరుగా సెక్రటేరియట్‌కు వెళ్లిపోయారు. యానిఫాంలోనే సెక్రటేరియట్‌కు వెళ్లి సుప్రీకోర్టు ఆదేశాలను చీఫ్ సెక్రటరీకి ఇచ్చారు. సుప్రీంకోర్టు ఆదేశాలను సీఎస్ దృష్టికి తీసుకెళ్లినట్లు ఏబీవీ చెప్పారు. సుప్రీంకోర్టు ఆదేశాల ప్రకారం సీఎస్‌కు రిపోర్ట్ చేశానని, పోస్టింగ్, పెండింగ్ జీతభత్యాల విషయాన్ని సీఎస్ దృష్టికి తీసుకెళ్లానని ఆయన వెల్లడించారు. అవసరమైన ఆదేశాలివ్వాలని సీఎస్‌ను కోరానని, లెటర్ ఇచ్చానని.. పోస్టింగ్ విషయం ప్రాసెస్‌లో పెడతారని ఏబీ వెంకటేశ్వరరావు తెలిపారు.
సుప్రీంకోర్టు ఆదేశాలు ఇంకా అందలేదని.. లేదా మరో కారణం చెప్పి పోస్టింగ్ నిరాకరించే పరిస్థితి లేకుండా ఏబీవీ జాగ్రత్తపడ్డారు. అయితే ఇప్పుడు ప్రభుత్వం ఏంచేస్తుందనేది ఆసక్తికరంగా మారింది. డీజీ ర్యాంక్‌లో ఉన్న అధికారికి.. కీలకమైన పోస్టింగే ఇవ్వాల్సి ఉంటుంది. ఆయనపై ప్రభుత్వానికి.. వైఎస్ఆర్‌సీపీకి ఎలాంటి నమ్మకం లేదు. ఆయన పోస్టింగ్ ఇస్తే ప్రభుత్వంలో టీడీపీ నేతను పెట్టుకున్నట్లేనని వారు భావిస్తారు. అందుకే పోస్టింగ్ ఇవ్వకుండా ఉండటానికి ఎన్ని ప్రయత్నాలు చేయాలో అన్నీ చేస్తారంటున్నారు.
సుప్రీంకోర్టు ఇచ్చిన తీర్పును ప్రభుత్వం ఉల్లంఘిస్తే పరిణామాలు తీవ్రంగా ఉంటాయి. అందుకే ప్రభుత్వం పోస్టింగ్ ఇవ్వడానికే ప్రాధాన్యం ఇస్తుందని భావిస్తున్నారు. గతంలోలా కోర్టుల్ని తేలిగ్గా తీసుకునే పరిస్థితి ఇప్పుడులేదని ప్రభుత్వ వర్గాలు భావిస్తున్నాయి. ప్రభుత్వానికి ఇబ్బంది కలిగించని పోస్టింగ్ ఇచ్చి… లూప్‌లైన్‌లో కూర్చోబెడతారని అంటున్నారు. అయితే ఏబీవీకి పోస్టింగ్ ఇచ్చేవరకూ ఏదైనా డౌటేనని ఉన్నతాధికారవర్గాలు భావిస్తున్నాయి.
