ప్రచారసభల్లో జగన్మోహన్ రెడ్డి అమాయకంగా తనపై కుట్రలు చేస్తున్నారని.. తాను ఎంతో మంచి వాడినని .. ఇది కలికాలం అంటూ చేస్తున్న వ్యాఖ్యలు ఆంధ్రజ్యోతి ఎండీ వేమూరి రాధాకృష్ణను సూటిగా తగిలాయి. ఆయనకు కూడా అలాగే అనిపించినట్లుగా ఉంది. ఈ కొత్తపలుకును పూర్తిగా ఆ కలికాలానికే కేటాయించారు. ఎంత కలి కాలం కాకపోతే.. అడ్డగోలుగా హత్యలు చేసి..దోపిడీలు చేసి.. అరాచకం చేసి… రాష్ట్రాన్ని సర్వనాశనం చేసి.. కూడా జగన్మోహన్ రెడ్డి కొంత మంది మద్దతు పొందుతారని ఆయన డౌట్. కళ్ల ముందు ఇంత కనిపిస్తున్నా జగన్మోహన్ రెడ్డికి కొంత మంది ఓటు వేసే వాళ్లు ఉండటం కలికాలమేనని ఆర్కే భావన.
కలికాలం పేరుతో జగన్ చెబుతున్న మాటలకు.. ఆయన చేసిన పనులు.. చేస్తున్న పనులకు పొంతన లేకపోవడంతో ఆర్కేకు కోపం వచ్చినట్లుగా ఉంటుంది. వైఎస్ వివేకా హత్య కేసు నుంచి ప్రతి విషయాన్ని విశ్లేషించే ప్రయత్నం చేశారు. చివరికి న్యాయం చేయమని అడుగుతున్న చెల్లెళ్లపైనా ఇష్టం వచ్చినట్లుగా నిందలు వేసి.. హంతకుడ్ని కాపాడుతున్న తీరు కలికాలమేననేది ఆర్కే భావన. అయితే ఈ కలికాలంలో కలి ఎవరో ప్రజలకు క్లారిటీ వచ్చిందని ముఖ్యంగా కడప ప్రజలకూ క్లారిటీ వచ్చిందని ఆర్కే చెబుతున్నారు. దానికి బస్సు యాత్ర పరిస్థితుల్నే సాక్ష్యంగా చూపిస్తున్నారు.
టీడీపీ కూటమి పొత్తులు పెట్టుకున్న తర్వాత వైసీపీ పరిస్థితి మెరుగు అయిందంటూ వైసీపీ మీడియా, సోషల్ మీడియా చేస్తున్నప్రచారంపైనా సెటైర్లు వేశారుు. వైసీపీ పరిస్థితి మెరుగు అయితే పార్టీ నేతలు ఎందుకు వెళ్లిపోతారని ఆర్కే ప్రశ్నిస్తున్నారు. ఇప్పటికే టిక్కెట్లు ఇచ్చిన వారిలోచాలా మంది తమకు చాన్స్ ఇస్తే కూటమి నుంచి పోటీ చేస్తామని రాయబారాలు నడుపుతున్నారని ఆర్కేచెబుతున్నారు. ఎంతగా ప్రచారం చేయిచినా ప్రయోజనం లేదని ఆర్కే తేల్చేశారు.
అయితే కలికాలం అంతరించి మంచి కాలం వస్తుందని కూడా ఆర్కే పరోక్షంగా జగన్ కు హెచ్చరికలు పంపారు. ఎన్నికల తర్వాత ఏం జరుగుతుందో బీఆర్ఎస్ పరిస్థితిని చూపి హింట్ ఇచ్చారు.అంతేనా… షర్మిల కాంగ్రెస్ లో చేరి రాజకీయం చేస్తోంది 2029 ఎన్నికల కోసమేనని అంటున్నారు. అంటే.. అప్పటికే జగన్ జైల్లో ఉంటాడు.. పార్టీ మళ్లీ కాంగ్రెస్ గా మారిపోతుందని చెప్పకనే చెప్పారు. కలికాలం అంటూ జగన్ అన్న ఒక్క మాటతో ఆర్కే ఇంత ర్యాగింగ్ చేశారని అనుకోవచ్చు.
