ఆంధ్రప్రదేశ్ ప్రభుత్వం మరోసారి ఫుల్ పేజీ యాడ్స్ ఇచ్చింది. ఈ సారి రాజకీయ దుమారం రేపుతున్న వన్ టైం సెటిల్మెంట్ స్కీం గురించి అవగాహన కోసం ఫుల్ పేజీ యాడ్స్ ఇచ్చారు. తహసీల్దార్ల దగ్గర్నుంచి వాలంటీర్ల వరకూ లబ్దిదారులకు వరుసగా రోజుకు మూడు సార్లు అవగాహన కల్పిస్తున్నా.. ఇంకా అవగాహన రావడం లేదనుకున్నారేమో కానీ ఈ సారి రూ. కోట్లు ఖర్చు పెట్టి ప్రకటనలు ఇచ్చారు. ఈ సారి ప్రకటనల్లో గత ప్రభుత్వంలోని రెండు పత్రాలను కూడా ప్రచురించారు. అందులో ఏముందోఎవరికీ కనిపించదు కానీ దాని సారాంశం మాత్రం గతంలో ఓటీఎస్ పెడదామని అధికారులు చంద్రబాబును అడిగితే ఆయన వద్దన్నారు. ఒక సారి కాదు నాలుగు సార్లు అలాగే అడిగితే వద్దన్నారు.
ఓటీఎస్ స్కీమ్ చంద్రబాబు వద్దన్నారని ప్రచారం చేస్తే అది వైసీపీకి ప్లస్సా ? మైనస్సా ?. ఎప్పుడో ప్రభుత్వం ఇచ్చిన ఇళ్లకు ఇప్పుడు డబ్బులు వసూలు చేయడం అనే కాన్సెప్టే వింతగా ఉంది. అందునా … తీసుకున్న రుణానికి మించి వసూలు చేయాలనుకోవడం మరీ వింత. రెందు దశాబ్దాల కింద ప్రభుత్వం ఇచ్చిన సబ్సిడీ పోను.. ఇచ్చిన రుణం రూ . ఇరవై వేలు కూడా ఉండదు. ఇప్పుడు అంత మొత్తం వసూలు చేస్తున్నారు. ఇలా పేదల నుంచి వసూలు చేయడం మంచి పద్దతి కాదన్న ఉద్దేశంతో అప్పటి ప్రభుత్వం వద్దనుకుందేమో కానీ ఆ విషయాన్ని ఇప్పుడు జగన్ సర్కార్ పేపర్ ప్రకటనలు ఇచ్చి మరీ హైలెట్ చేస్తోంది.
పేద ప్రజల నుంచి డబ్బులు వసూలు చేయడం అనే కాన్సెప్ట్‌ను ఏ రాజకీయ నాయకుడూ అంగీకరించరు. పైగా వారు ఉంటున్న ఇంటికి వారికి హక్కులిస్తామని చెప్పడం చాలా విచిత్రంగా ఉంటుంది. ఈ విషయాలను పట్టించుకోకుండా దాదాపుగా రూ. నాలుగు వేల కోట్లను ప్రజల వద్ద నుంచి వసూలు చేయాలని నిర్ణయించుకున్న జగన్ సర్కార్.. గత ప్రభుత్వానికి అధికారులు ప్రతిపాదనలు పెట్టినా అమలు చేయలేదని వాదిస్తోంది. ఇంత వ్యతిరేకత వస్తున్న ఈ పథకాన్ని గత ప్రభుత్వం అమలు చేయలేదంటే అప్పటి సీఎంకు ప్లస్ అవుతుంది కానీ మైనస్ అవుతుందా..?
పేదలపై భారం పడకూడదనే తాము ఓటీఎస్ అమలు చేయలేదని… టీడీపీ ఇప్పుడు వాదిస్తుంది. అందుకే వచ్చాక ఉచితంగా రిజిస్ట్రేషన్లు చేస్తామని ఇప్పటికే ప్రకటిస్తోంది. పేద ప్రజలకు మేలు చేయాలంటే ఉచితంగా రిజిస్ట్రేషన్లు చేయవచ్చు కదా.. ఇలా వసూలు చేయడం ఎందుకని టీడీపీ ప్రశ్నిస్తోంది. దీనికి వైసీపీ వద్ద ఆన్సర్ ఉండదు. ఎలా చూసినా.. ఓటీఎస్ విషయంలో ఏపీ ప్రభుత్వం కిందా మీదా పడుతోంది. చివరికి మెడకు చుట్టుకునేలా ఉంది.
