కృత్రిమ మేధ రాకతో ప్రపంచవ్యాప్తంగా సాఫ్ట్‌వేర్ రంగంలో ఒక విధమైన అలజడి మొదలైంది. ముఖ్యంగా భారతీయ ఐటీ దిగ్గజాలైన టీసీఎస్, ఇన్ఫోసిస్ వంటి కంపెనీల షేర్లు పడిపోవడం, భవిష్యత్తులో కోడింగ్ అనేదే ఉండదన్న ఏఐ సీఈవోల వ్యాఖ్యలు ఐటీ ఉద్యోగుల్లో తీవ్ర ఆందోళనను నింపుతున్నాయి. అయితే, ఈ భయాల వెనుక ఉన్న వాస్తవాలను, ఆర్థిక సూత్రాలను మాత్రం ఎవరూ విశ్లేషించడం లేదు.

ఏఐ అనేది ఉత్పాదకతను పెంచే ఒక సాధనమే

ఏఐ అనేది మానవ శ్రమను పూర్తిగా రీప్లేస్ చేస్తుందని అనుకోవడం ప్రాథమిక ఆర్థిక సూత్రాలకే విరుద్ధం. ఒకవేళ ఏఐ వల్ల అందరి ఉద్యోగాలు పోతే, ప్రజల దగ్గర కొనుగోలు శక్తి ఉండదు. ప్రజల వద్ద డబ్బు లేనప్పుడు, ఆ ఏఐ తయారు చేసే ఉత్పత్తులను ఎవరు కొంటారు? కంపెనీలకు ఆదాయం ఎక్కడి నుండి వస్తుంది? ఒకవేళ ఏఐ ఆర్థిక వ్యవస్థలను కుప్పకూలిస్తే, అసలు ఏఐ కంపెనీలకే మనుగడ ఉండదు. కాబట్టి, ఏఐ అనేది ఉత్పాదకతను పెంచే ఒక సాధనమే తప్ప, మానవ ఆర్థిక వ్యవస్థను నాశనం చేసే శక్తి కాదు.

బ్యాంకింగ్ రంగం ఉదాహరణ

సాంకేతికత మారిన ప్రతిసారీ ఇలాంటి భయాలు కలగడం సహజం. 1980వ దశకంలో బ్యాంకింగ్ రంగంలో కంప్యూటర్లు ప్రవేశించినప్పుడు, ఇక క్లర్క్ ఉద్యోగాలు ఉండవని, మొత్తం కంప్యూటర్లే చేస్తాయని పెద్ద ఎత్తున నిరసనలు జరిగాయి. కానీ వాస్తవంలో ఏం జరిగింది? కంప్యూటర్ల వల్ల పని సులభమైంది, బ్యాంకింగ్ సేవలు విస్తృతమయ్యాయి. తద్వారా గతంలో కంటే ఇప్పుడు లక్షల్లో ఎక్కువ ఉద్యోగాలు భర్తీ అవుతున్నాయి. సాంకేతికత పనిని సులభం చేస్తుందే తప్ప, దాన్ని నడిపించే మానవ శక్తిని ఎప్పటికీ పూర్తిగా భర్తీ చేయలేదు.

ఉద్యోగాలు తగ్గవు – రోల్స్ మారుతాయి

ఏఐ వల్ల ఉద్యోగాలు పోవు, కానీ ఉద్యోగాల స్వభావం మారుతుంది. గతంలో వంద గంటలు పట్టే కోడింగ్ పనిని ఏఐ ఇప్పుడు పది గంటల్లో చేయవచ్చు. అంటే మిగిలిన తొంభై గంటల సమయాన్ని సాఫ్ట్‌వేర్ ఇంజనీర్లు సృజనాత్మకత , ఆర్కిటెక్చర్ డిజైనింగ్ , క్లిష్టమైన సమస్యల పరిష్కారంపై కేటాయించవచ్చు. కొత్త నైపుణ్యాలను నేర్చుకోవడమే ఇక్కడ కీలకం. ఆ మార్పును ఒడిసి పట్టుకున్న వారికి ఏఐ ఒక శత్రువులా కాకుండా, ఒక శక్తివంతమైన సహాయకుడిలా మారుతుంది.

ప్రస్తుత ప్రచారంతో సాఫ్ట్ వేర్ ఉద్యోగులపై ఒత్తిడి

ప్రస్తుతం సాఫ్ట్‌వేర్ ఉద్యోగులు తీవ్రమైన పని ఒత్తిడితో పాటు, భవిష్యత్తుపై అభద్రతా భావంతో సతమతమవుతున్నారు. అగ్ర కంపెనీల సీఈవోలు మార్కెట్ ప్రయోజనాల కోసం చేసే సంచలన వ్యాఖ్యలు సామాన్య ఉద్యోగి మానసిక స్థితిని దెబ్బతీస్తున్నాయి. సాంకేతిక మార్పుల గురించి ప్రచారం చేసేటప్పుడు అది విధ్వంసం లా కాకుండా, పరిణామం లా ఉండేలా సున్నితంగా వ్యవహరించాలి. పానిక్ సృష్టించడం వల్ల ప్రతిభావంతులు ఈ రంగం పట్ల విముఖత చూపే ప్రమాదం ఉంది. సాంకేతికత ఎప్పుడూ మానవుడికి యజమానిగా మారలేదు. ఏఐ అనేది మానవ మేధస్సుకు ఒక అదనపు బలం మాత్రమే. ఐటీ ఉద్యోగులు భయపడాల్సింది ఏఐ గురించి కాదు, మారుతున్న కాలంతో పాటు తాము అప్‌డేట్ అవ్వకపోవడం గురించి మాత్రమే.