ఈనెల 23న ‘మారుతి నగర్ సుబ్రహ్మణ్యం’ అనే ఓ చిన్న సినిమా విడుదల అవుతోంది. రావు రమేష్ కీలక పాత్ర పోషించారు. మిగిలిన వాళ్లంతా కొత్తే. అయితే ఈ సినిమా ఇప్పుడు టాక్ ఆఫ్ ది టౌన్ అయ్యింది. ఎందుకంటే ఈ సినిమా ప్రీ రిలీజ్ వేడుకకు అల్లు అర్జున్, సుకుమార్ సంయుక్తంగా వస్తున్నారు. ‘పుష్ప 2’లో రావు రమేష్ నటిస్తున్నాడు. ఆ ఆబ్లిగేషన్ తో బన్నీ, సుకుమార్లు ఈ ఈవెంట్ కి వస్తున్నారు అనుకొంటున్నారంతా. కానీ ఈ కథ వేరే వుంది.
Also Read : ఈరోజు బన్నీ ఏం మాట్లాడతాడో..?!
సుకుమార్ భార్య తబిత ఈ చిత్రానికి సమర్పకురాలుగా వ్యవహరించారు. నిజానికి తబితకీ ఈ సినిమాకూ ఎలాంటి లింక్ లేదు. ‘మారుతి నగర్…’ దర్శకుడు లక్ష్మణ్ కార్యకు ఓ వదిన ఉన్నారు. ఆమె సుకుమార్ భార్య తబిత కిట్టీ పార్టీ ఫ్రెండ్స్. ఓ సందర్భంలో ‘మారుతి నగర్’ సినిమా గురించి తబిత తెలుసుకొని, కొన్ని సీన్స్ చూశార్ట. అదే కిట్టీ పార్టీలో మిగిలిన ఆడవాళ్లకీ ఈ సినిమా చూపించారు. వాళ్లందరికీ బాగా నచ్చింది. దాంతో తబిత తనకు తానే ముందుకొచ్చి, ఈ సినిమాని నేను ప్రమోట్ చేస్తా అంటూ ఆ బాధ్యత తన భుజాలపై వేసుకొన్నారు. అలా తబిత పేరు ఈ సినిమా పోస్టర్ పై పడింది. కేవలం తబిత అడగడం వల్లే బన్నీ ఈ ఈవెంట్ కు ముఖ్య అతిథిగా రావడానికి ఒప్పుకొన్నార్ట. అలా తబిత రికమెండేషన్ ఈ సినిమాకు చాలా స్ట్రాంగ్ గా పని చేసింది. ఓ కిట్టీ పార్టీ వల్ల తబిత సినిమా చూడడం ఏమిటి, ఆ సినిమాకు ప్రజెంటర్ గా తన పేరు పడడం ఏమిటి, ఆ వెంటనే బన్నీ, సుకుమార్లు ఈ సినిమా ప్రమోషన్లలో పార్ట్ కావడం ఏమిటి? అంతా వింత వింతగా ఉంది. చిత్రసీమలో అంతే. ఒక్కోసారి చిన్న చిన్న పరిచయాలు పెద్ద పెద్ద మలుపులకు కారణం అవుతాయి. ఏదైతేనేం.. కిట్టి పార్టీ వల్ల ‘మారుతి నగర్’కు గట్టి ప్రమోషన్ అయితే లభించింది.
