అల్లు అర్జున్ – సుకుమార్ కాంబినేష‌న్‌లో త‌యార‌వుతున్న సినిమా `పుష్ష`. ఈ సినిమా గురించి ఎప్పుడు ప్ర‌స్తావ‌న‌కు వ‌చ్చినా, ఎర్ర చంద‌నం స్మ‌గ్లింగ్ నేప‌థ్యంలో జ‌రిగే క‌థ అనే మాట్లాడుకున్నారు. నిజానికి.. ఇదో ఫ్యామిలీ డ్రామా. భార్యాభ‌ర్త‌ల క‌థ. సుకుమార్ త‌న క‌థ‌లో ఎలాంటి పాయింట్ ట‌చ్ చేసినా.. దానికి ఎమోష‌న్ జోడించ‌డం మ‌ర్చిపోడు. `100 % లవ్`లో లెక్క‌లుంటాయి. కానీ బావామ‌ర‌ద‌ళ్ల ఇగో కూడా క‌నిపిస్తుంది. `నాన్న‌కు ప్రేమ‌తో`లో రివెంజ్ ఉంటుంది. కానీ తండ్రీ కొడుకుల ఎమోష‌న్ ఉంటుంది. `రంగ‌స్థ‌లం`లో రాజకీయం ఉంటుంది. కానీ అన్నా, తమ్ముళ్ల అనుబంధం కూడా ఆవిష్కృత‌మ‌వుతుంది.
ఈసారీ అంతే. ఎర్ర‌చంద‌నం స్మ‌గ్లింగ్‌ని సుకుమార్ ఓ పాయింట్ గా తీసుకున్నాడు. అయితే దానికి భార్యా భ‌ర్త‌ల బంధాన్ని జోడించి చెప్ప‌బోతున్నాడు. హీరో, హీరోయిన్ మ‌ధ్య లవ్ సీన్లు, డ్యూయెట్లు ఇవేమీ ఈ సినిమాలో ఉండ‌వు. తొలి స‌న్నివేశం నుంచే.. బ‌న్నీ, ర‌ష్మిక‌ల‌ను భార్యాభ‌ర్త‌లుగా ప‌రిచ‌యం చేయ‌బోతున్నాడ‌ట. అంటే తొలిసారి బ‌న్నీని ఓ భ‌ర్త‌గా చూడ‌బోతున్నాం అన్న‌మాట. ఎంత వ‌య‌సొచ్చినా మ‌న హీరోలు లవ్ ట్రాక్‌లు న‌డ‌పడానికీ, హీరోయిన్ల‌ని టీజింగ్ చేయ‌డానికి చూస్తుంటారు. ఈ సినిమాకి మాత్రం.. ఆ ప‌ద్ధ‌తి మార్చాడు సుకుమార్.
