ఇండియాలో బిగ్గెస్ట్ టాక్ షో ఇదే: అల్లు అర‌వింద్‌

ఓటీటీ వేదిక‌ ఆహాకి స‌రికొత్త ఉత్సాహాన్ని ఇచ్చింది అన్ స్టాప‌బుల్ షో. ఇప్పుడు సెకండ్ సీజ‌న్ ముగింపు ద‌శ‌కు వ‌చ్చింది. ఈ షోకి ప‌వ‌న్ క‌ల్యాణ్‌ని తీసుకొచ్చి శుభం కార్డు వేసింది ఆహా! ఈ సంద‌ర్భంగా ఇండియాలో బిగ్గెస్ట్ టాక్ షో… అన్ స్టాప‌బుల్ అంటూ ప్ర‌క‌టించేశారు అల్లు అర‌వింద్‌. అస‌లు ఈ షో.. ఇంత పెద్ద హిట్ అవుతుంద‌ని అనుకోలేద‌ని, ఇండియా మొత్తం ఇప్పుడు అన్ స్టాప‌బుల్ వైపు చూస్తోంద‌ని స్టేట్‌మెంట్ ఇచ్చారు. అన్ స్టాప‌బుల్ సూప‌ర్ హిట్ అయిన మాట వాస్త‌వం. తెలుగు టాక్ షోల‌లో.. దీనిదే అగ్ర తాంబూలం. అయితే.. ఇండియాలో మ‌రిన్ని గొప్ప టాక్ షోలు ఉన్నాయి. కాఫీ విత్ క‌ర‌ణ్‌, క‌పిల్ శ‌ర్మ షో కూడా… టాప్ 1, 2ల‌లో ఉంటుంది. వాటికి రేటింగులు కూడా ఎక్కువే. కాక‌పోతే.. తెలుగులో ఇంత పాపుల‌ర్ అయిన షో లేదు. బాల‌కృష్ణ‌ని టాక్ షోకి తీసుకురావ‌డం.. ఆహా చేసిన తెలివైన ప‌ని. కేవ‌లం బాల‌య్య వ‌ల్లే ఈ షోకి ఇంత గ్లామ‌ర్ వ‌చ్చింద‌న‌డంలో ఎలాంటి సందేహం లేదు. ప‌వ‌న్ క‌ల్యాణ్‌ని గెస్ట్ గా తీసుకొచ్చి…. అన్ స్టాప‌బుల్ 2 కి.. స‌రైన ముగింపే ఇచ్చారు. ఇక ఈ షోలో ఎలాంటి ప్ర‌శ్న‌లు వ‌స్తాయా? వాటికి ప‌వ‌న్ ఎలాంటి స‌మాధానాలు చెబుతాడా? అనే ఆస‌క్తి స‌ర్వ‌త్రా వ్య‌క్తం అవుతోంది.