అమరావతి స్వప్నం సాకారం అవుతోందంటే దానికి కారణం రైతులే. భూములు ఇచ్చారు. కేసుల పాలయ్యారు. లాఠీచార్జీలను ఎదుర్కొన్నారు. గొప్ప పోరాటంతో నిలబెట్టుకున్న అమరావతి వల్ల కలిగే లాభాలు కూడా మొదట అమరావతి రైతులకే దక్కాలి. ప్రస్తుతం మొదటి విడత అమరావతి పనులు జరుగుతున్న వైనం , ప్రపంచస్థాయి సంస్థలు ఆసక్తి, పెట్టుబడుల రాక .. రైతుల త్యాగాలకు తగ్గ విలువను జోడిస్తున్నాయి. రాబోయే రోజుల్లో అమరావతి రైతుల స్థలాలకు ఊహించనంత మొత్తం లభించే అవకాశం ఉంది.

ప్రపంచస్థాయి రాజధానిగా అమరావతి

2019లో తెలుగుదేశం పార్టీ ఓడిపోయి ఉంటే రాజధాని ఇప్పటికే ఓ రూపానికి వచ్చి ఉండేది. కానీ అలా జరగలేదు కాబట్టి ఆ కాలం గురించి మర్చిపోయి ఇప్పుడు జరగాల్సిన అంశాలపై ప్రభుత్వం దృష్టి పెట్టింది. శరవేగంగా మళ్లీ పట్టాలెక్కించింది. ముందుగా అసలు ఆర్థిక సమస్యలు లేకుండా చేసింది. ప్రభుత్వ పనులకు తోడు ఇతర ప్రైవేటు, కేంద్ర ప్రభుత్వ సంస్థల పనులు కూడా సమాంతరంగా జరిగేలా ఏర్పాట్లు చేసింది. ఒక్క క్షణం కూడా పనులు ఆగకుండా సాగుతున్నాయి. ఇలా రెండేళ్ల పాటు సాగితే.. మొత్తానికి ఓ రూపం వస్తుంది. అప్పటికి ప్రైవేటు సంస్థల పెట్టుబడులు ఓ రేంజ్ కు చేరుకుంటాయి.

రైతుల త్యాగాలకు, పోరాటాలకు తగ్గ ఫలితం

అమరావతి అభివృద్ధి చెందడం వల్ల లభించే మొదటి ప్రయోజనాలు రైతులకు దక్కాలి. దక్కుతాయి కూడా. రైతులు రాజధాని చరిత్రలో చిరస్థాయిగా ఉంటారు. అంతే కాదు అక్కడ ఆర్థిక వృద్ధితో తాము కూడా వృద్ధి చెందుతారు. తమకు లభించిన అభివృద్ధి చేసిన ప్లాట్లు వారిని అమరావతి ఆర్థిక వృద్ధిలో భాగం చేస్తాయి. వారి కుటుంబాలు అమరావతికి నిర్మాణంలో తాము కూడా భాగమని సంతృప్తితో ఉంటారు.

రెండో విడత పూలింగ్ కూ రైతుల ఆసక్తి

దాదాపుగా పదహారు వేల ఎకరాల రెండో విడత పూలింగ్ కోసం ప్రభుత్వం సిద్ధం అయింది. నేడో రేపో నోటిఫికేషన్ జారీ చేయనున్నారు. ప్రపంచస్థాయి నగరానికి అవసరమైన వివిధ రకాల పనులు ఆ భూముల్లో చేపడతారు. ఇప్పటికే అమరావతికి ఓ రూపం వస్తున్నందున వారంతా ఆసక్తి చూపించే అవకాశం ఉంది. రైతులు తమ భూముల్ని ఇస్తూ.. రాష్ట్రానికి రాజధాని కల్పిస్తూ.. తాము అభివృద్ధి చెందుతున్న వైనం ఓ స్ఫూర్తిదాయక మోడల్ గా ప్రపంచం అంతా ఆసక్తిగా చూస్తోంది.