ఆంధ్రప్రదేశ్ రాష్ట్ర సమాచార కమిషనర్ల నియామకం పూర్తయింది. కానీ టీడీపీ వర్గాల్లో భిన్నమైన ప్రచారం జరుగుతోంది. ప్రధాన సమాచార కమిషనర్ గా వజ్జా శ్రీనివాసరావుతో పాటు, మరో నలుగురు కమిషనర్లను ప్రభుత్వం నియమించింది. అయితే, ఈ ఎంపిక ప్రక్రియలో ప్రభుత్వం అనుసరించిన విధానం గత ప్రభుత్వ తీరుకు పూర్తి భిన్నంగా ఉండటం ఇప్పుడు హాట్ టాపిక్గా మారింది. ఈ కమిటీలో మెజారిటీ స్థానాలను న్యాయవాదులకే కేటాయించడం ద్వారా సమాచార కమిషన్ నిబద్ధతను, నిష్పాక్షికతను కాపాడాలని ప్రభుత్వం భావించినట్లు స్పష్టమవుతోంది. కానీ రాజకీయంగా మాత్రం అనేక ప్రశ్నలు వస్తున్నాయి.
లాయర్లకే అవకాశం కల్పించిన ప్రభుత్వం
వైఎస్సార్ కాంగ్రెస్ పార్టీ ప్రభుత్వ హయాంలో సమాచార కమిషనర్ల ఎంపికపై తీవ్ర విమర్శలు వ్యక్తమయ్యాయి. ఆ సమయంలో తమ పార్టీకి అనుకూలంగా వ్యవహరించే జర్నలిస్టులకు, రాజకీయ విధేయులకు ఈ పదవులను కట్టబెట్టారు. దీనివల్ల సమాచార కమిషన్ ఒక రాజకీయ పునరావాస కేంద్రంగా మారిందని, పారదర్శకత లోపించిందని అప్పట్లో ప్రతిపక్షాలు మండిపడ్డాయి. కానీ, ప్రస్తుత కూటమి ప్రభుత్వం నియామకాల్లో రాజకీయ జోక్యం కంటే, చట్టబద్ధమైన పరిజ్ఞానానికి పెద్దపీట వేసింది. నియామకాల్లో నలుగురు న్యాయవాదులకు చోటు కల్పించడం వెనుక ఒక బలమైన ఉద్దేశం కనిపిస్తోంది. సమాచార హక్కు చట్టం వినియోగంలో న్యాయపరమైన చిక్కులు, తీర్పుల విషయంలో లాయర్ల అనుభవం కమిషన్ పనితీరును మెరుగుపరుస్తుందని ప్రభుత్వం భావిస్తోంది.
టీడీపీకి సన్నిహితంగా ఉన్న జర్నలిస్టులకు నిరాశ
ఐదుగురిలో కేవలం ఒక్కరికి మాత్రమే జర్నలిజం నేపథ్యం ఉంది. జనసేన మద్దతుదారుడిగా గుర్తింపు పొందిన చక్రవర్తి మాత్రమే జర్నలిస్టు కోటాలో ఎంపికయ్యారు. మిగిలిన వారంతా న్యాయవాదులు కావడంతో, కమిషన్ నిబద్ధతపై ప్రజల్లో నమ్మకం పెరిగే అవకాశం ఉంది. అదే సమయంలో, ఈ నియామకాలు తెలుగుదేశం పార్టీని నమ్ముకున్న జర్నలిస్ట్ వర్గాల్లో కొంత అసంతృప్తికి దారితీసే అవకాశం కనిపిస్తోంది. గత ఎన్నికల్లో పార్టీ విజయం కోసం, ప్రభుత్వ వ్యతిరేక విధానాలపై పోరాడిన పలువురు సీనియర్ జర్నలిస్టులు తమకు ఈ పదవుల్లో అవకాశం దక్కుతుందని ఆశించారు. కానీ, ప్రభుత్వం మాత్రం రాజకీయాలకు అతీతంగా నిబద్ధత కలిగిన వ్యక్తులకు ప్రాధాన్యం ఇవ్వాలని నిర్ణయించుకోవడం చర్చనీయాంశమైంది. ఇది పరిపాలనా పరంగా మంచి నిర్ణయమే అయినప్పటికీ, పార్టీ శ్రేణుల్లో జర్నలిస్ట్ మిత్రుల్లో ఒకింత నిరాశను మిగిల్చింది.
రెండు కమిషనర్ పదవులైనా జర్నలిస్టులకు ఇవ్వాల్సింది !
ఆంధ్రప్రదేశ్ సమాచార కమిషన్ నియామకాలు రాష్ట్ర ప్రభుత్వ ప్రాధాన్యతలను తెలియజేస్తున్నాయి. రాజకీయ అవకాశవాదానికి తావు లేకుండా, వ్యవస్థలను ప్రక్షాళన చేయాలనే దిశగా అడుగులు వేస్తున్నట్లు ఈ ఎంపికలు సంకేతాలిస్తున్నాయి. కానీ రాజకీయ పరంగా మాత్రం ఈ నియామకాలు అసంతృప్తిని కలిగిస్తున్నాయి. రెండు పదవులు అయినా జర్నలిస్టులకు ఇచ్చి ఉండాల్సిందన్న అభిప్రాయం వినిపిస్తోంది.
