ఆంధ్రప్రదేశ్ ప్రభుత్వం ఇవాళ అనేక పత్రికలలో పంచాయతీ ఎన్నికలకు సంబంధించి ఫుల్ పేజీ ప్రకటన ఇచ్చింది. ” ఇవి పార్టీ రహిత ఎన్నికలు, పార్టీలకు అతీతంగా జరుగుతున్న ఎన్నికలు, మన పంచాయతీ ఎన్నికలు. పంచాయతీలు ఏకగ్రీవం చేసుకుందాం, గ్రామాభివృద్ధికి సోపానాలు వేసుకుందాం” అంటూ సాక్షి సహా అనేక పత్రికలలో వచ్చిన ప్రకటన ఇప్పటికే విమర్శలకు తావిచ్చింది. మొదటిగా పంచాయతీలను ఎన్నుకునే అధికారాన్ని ప్రజల చేతుల్లో పెట్టకుండా ఏకగ్రీవం పేరుతో అధికార పార్టీ తమకు అనుకూలమైన అభ్యర్థులను ఎన్నిక చేయించుకోవడానికి ప్రయత్నిస్తోందని ఇతర పార్టీల నుండి విమర్శలు వినిపిస్తున్నాయి. అయితే దానితో పాటు, గ్రామ పంచాయతీలకు సంబంధించిన ఎంబ్లెమ్ కూడా సరి చూసుకోకుండా ప్రకటన ఇవ్వడం మరొక విమర్శకు తావిచ్చింది. వివరాల్లోకి వెళితే..
ఆంధ్రప్రదేశ్ ప్రభుత్వం ఇచ్చిన ప్రకటనలో పంచాయతీలకు సంబంధించిన చిహ్నాన్ని మూడు చోట్ల వాడారు. వీటిల్లో పై రెండింటిలో సరిగానే ఉన్నప్పటికీ, మూడవ ఎంబ్లెమ్ మాత్రం తెలంగాణకు చెందిన గ్రామ పంచాయతీ కార్యాలయానికి సంబంధించిన లోగోని వాడారు. దీనిపై నెటిజన్లు స్పందిస్తూ, లక్షల్లో జీతాలు తీసుకుంటున్న మీడియా సలహాదారులు కనీసం ఆంధ్రప్రదేశ్ గ్రామ పంచాయతీ చిహ్నం ఏదో కూడా తెలియకుండా పనిచేస్తున్నారు అంటూ ఎద్దేవా చేశారు. జనసేన అధికార ప్రతినిధి కూసంపూడి శ్రీనివాస్ కూడా దీనిపై సోషల్ మీడియాలో స్పందిస్తూ, “కోట్ల రూపాయలు ఖర్చు పెట్టి ఏపీ ప్రభుత్వం వారు ఇచ్చిన ప్రకటనలో తెలంగాణ కు చెందిన గ్రామ పంచాయతీ కార్యాలయ ఫోటో ఎందుకు పెట్టుకోవాల్సి వచ్చింది? ఆ పంచాయతీ కార్యాలయ చిహ్నంలో తెలంగాణ ప్రభుత్వం చిహ్నం మీరే చూడండి. అంటే పబ్లిసిటీ చేసుకోవడానికి అధికారులకి ఏపీలో గ్రామ పంచాయతీ భవనాల ఫోటోలే దొరకలేదంటారా??” అని రాసుకొచ్చారు.
టీవీ చానల్స్ లో దీనిపై కథనం ని ప్రసారం చేయకపోయినప్పటికీ, అనేక మంది జర్నలిస్టులు కూడా ఈ ప్రకటన చూసి నవ్వుకుంటున్నారు. కనీసం ఆంధ్రప్రదేశ్ చిహ్నానికి, తెలంగాణ చిహ్నానికి తేడా కూడా తెలియకుండా అధికారులు, మీడియా సలహాదారులు పని చేస్తున్నారంటూ వారు విమర్శిస్తున్నారు
ఆ పెట్టేదేదో ఆంధ్రప్రదేశ్ గ్రామ పంచాయతీ కార్యాలయం ఫోటో పెడితే బాగుంటుంది గానీ…. తెలంగాణ గ్రామ పంచాయతీ భవనం ఫోటో ఎందుకు సార్?@IPRAndhra pic.twitter.com/9MrXX4hNEQ
— srinivas kusampudi (@SriKusampudi) January 27, 2021
