ఆయుర్వేద వైద్యులు ఆపరేషన్లు చేయడానికి ఆంధ్రప్రదేశ్ ప్రభుత్వం తాజాగా అనుమతి ఇచ్చింది. ఆయుర్వేదంలో పీజీ పూర్తి చేసిన వైద్యులు స్వతంత్రంగా శస్త్రచికిత్సలు నిర్వహించేందుకు ఆంధ్రప్రదేశ్ ఆరోగ్య శాఖ మంత్రి సత్యకుమార్ యాదవ్ గ్రీన్ సిగ్నల్ ఇచ్చారు. కేంద్ర ప్రభుత్వం 2020లో జారీ చేసిన గెజిట్ నోటిఫికేషన్‌ను అనుసరిస్తూ, రాష్ట్రంలో సుమారు 58 రకాల శస్త్రచికిత్సలకు జనరల్ సర్జరీ, ENT, కంటి ఆపరేషన్లు అనుమతి లభించింది. ప్రాచీన వైద్య విధానాన్ని ఆధునిక పరిజ్ఞానంతో మేళవించి వైద్య కొరతను తీర్చడమే దీని వెనుక ఉన్న ప్రభుత్వ ఉద్దేశం.

ఆయుర్వేద ఆపరేషన్లు ఎలా సాధ్యం?

ఈ నిర్ణయం వైద్య వర్గాల్లో విస్మయానికి గురి చేస్తోంది. ఆధునిక శస్త్రచికిత్స అనేది అనస్థీషియా నుండి పోస్ట్-ఆపరేటివ్ కేర్ వరకు అనేక విభాగాలతో కూడిన సంక్లిష్ట ప్రక్రియ. కేవలం ఆయుర్వేద విద్యలో సర్జరీ ఒక భాగం అనే కారణంతో, ఎలోపతి నిపుణులతో సమానంగా శస్త్రచికిత్సలకు అనుమతించడం ప్రజారోగ్యానికి ముప్పు కలిగిస్తుందని భారత వైద్య సంఘం మొదటి నుండి హెచ్చరిస్తూనే ఉంది. ప్రాచీన భారతీయ వైద్య విధానమైన ఆయుర్వేదానికి పునర్వైభవం తీసుకురావాలనేది ప్రభుత్వ ఉద్దేశ్యం కావొచ్చు. అయితే, ఆధునిక వైద్య శాస్త్రం లో దశాబ్దాల తరబడి శిక్షణ పొంది, ప్రాణాపాయ స్థితిలో చేసే శస్త్రచికిత్సలను కేవలం ఒక బ్రిడ్జ్ కోర్సుతోనో లేదా పరిమిత శిక్షణతోనో ఆయుర్వేద వైద్యులకు అప్పగించడం ఎంతవరకు సమంజసం అనే ప్రశ్నలు తలెత్తుతున్నాయి.

తీవ్రంగా వ్యతిరేకించిన పీవీ రమేష్

మాజీ ఐఏఎస్ అధికారి , వైద్య నిపుణులైన పీవీ రమేష్ ఈ తరహా నిర్ణయాలను గతంలోనే తీవ్రంగా వ్యతిరేకించారు. ప్రజారోగ్య వ్యవస్థలో ఇలాంటి ప్రయోగాలు పెను విపత్తుకు రెసిపీ వంటివని ఆయన అభిప్రాయపడ్డారు. ముఖ్యంగా గ్రామీణ ప్రాంతాల్లో వైద్యుల కొరతను సాకుగా చూపి నాణ్యత లేని వైద్యాన్ని అందించడం ప్రజల ప్రాణాలతో చెలగాటం ఆడటమేనని ఆయన తన ట్వీట్ల ద్వారా స్పష్టం చేశారు. ఆయుర్వేదాన్ని ప్రోత్సహించడం మంచిదే అయినా, ప్రాణాలతో ముడిపడిన శస్త్రచికిత్సల విషయంలో తగిన శిక్షణ , ప్రమాణాలు లేకుండా అనుమతులు ఇవ్వడం భవిష్యత్తులో ఇబ్బందులకు దారితీయవచ్చునన్న ఆందోళన వ్యక్తమవుతోంది.

వైద్య వర్గాల నుంచీ వ్యతిరేకత

వైద్య నిపుణులు సైతం దీన్ని తీవ్రంగా వ్యతిరేకిస్తున్నారు. శస్త్రచికిత్స అనేది కేవలం కోత కోయడం కాదు, దానికి ఎంతో అనుభవం, అత్యాధునిక పరికరాల పరిజ్ఞానం అవసరం. ఆయుర్వేదంలో సుశ్రుతుడు శస్త్రచికిత్సలకు ఆద్యుడైనప్పటికీ, నేటి ఆధునిక వైద్య సాంకేతికత పూర్తిగా భిన్నమైనది. రెండు భిన్నమైన వైద్య విధానాలను కలిపి మిక్సోపతిని ప్రోత్సహించడం వల్ల అటు ఆయుర్వేదం యొక్క స్వచ్ఛత దెబ్బతినడమే కాకుండా, ఇటు ఆధునిక వైద్యంపై ప్రజలకు ఉన్న నమ్మకం సడలే అవకాశం ఉందన్న వాదన వినిపిస్తోంది. ప్రభుత్వం నిపుణుల కమిటీలతో చర్చించి, శాస్త్రీయ దృక్పథంతో ముందడుగు వేయాల్సిన అవసరం ఉంది. లేకపోతే ఈ నిర్ణయం భవిష్యత్తులో తీవ్రమైన పరిణామాలకు దారితీయవచ్చనన్న ఆందోళన వ్యక్తమవుతోంది.