హైదరాబాద్ పశ్చిమ కారిడార్‌లో సంచలనం సృష్టించిన కోకాపేట, ఖానామెట్ నియోపోలిస్ లేఅవుట్ల సరసన ఇప్పుడు రాజేంద్రనగర్ పరిధిలోని బుద్వేల్ వచ్చి చేరింది. హైదరాబాద్ మహానగరాభివృద్ధి సంస్థ ఇక్కడ త్వరలోనే రెండో విడత ప్లాట్ల వేలానికి ముమ్మర కసరత్తులు సిద్ధం చేస్తోందనే వార్తలు రియల్ మార్కెట్లో ప్రకంపనలు సృష్టిస్తున్నాయి. తొలి విడత వేలంలో ప్రభుత్వానికి భారీ ఆదాయం తెచ్చిపెట్టిన ఈ లేఅవుట్‌లో, ఈసారి మరిన్ని లగ్జరీ కమర్షియల్ రెసిడెన్షియల్ ప్లాట్లను అందుబాటులోకి తెస్తుండటంతో ప్రముఖ దేశీయ, అంతర్జాతీయ రియల్ ఎస్టేట్ డెవలపర్లు ఇక్కడి భూములను దక్కించుకోవడానికి ఇప్పటి నుంచే వ్యూహాలు రచిస్తున్నారు.

ఐటీ కారిడార్ కనెక్టివిటీనే పెద్ద అసెట్!

బుద్వేల్ ప్రాంతానికి రియల్ ఎస్టేట్ పరంగా ఇంతటి భారీ డిమాండ్ రావడానికి ప్రధాన కారణం దాని అద్భుతమైన లొకేషన్, కనెక్టివిటీ. ఔటర్ రింగ్ రోడ్డు కు ఆనుకుని ఉండటం, గచ్చిబౌలి, ఫైనాన్షియల్ డిస్ట్రిక్ట్, మాదాపూర్ వంటి ప్రధాన ఐటీ హబ్‌లకు కేవలం 10 నుండి 15 నిమిషాల వ్యవధిలోనే చేరుకునే వీలుండటం ఈ ప్రాంతానికి కలిసి వచ్చింది. దీనికి తోడు శంషాబాద్ అంతర్జాతీయ విమానాశ్రయానికి వెళ్లే మార్గంలో ఉండటంతో బహుళజాతి సంస్థలు తమ తదుపరి కార్యాలయాల స్థాపనకు బుద్వేల్‌ను ఉత్తమ ప్రత్యామ్నాయంగా భావిస్తున్నాయి. ఐటీ కారిడార్‌లో స్థలం కొరత ఏర్పడుతుండటంతో, డెవలపర్ల చూపు ఇప్పుడు బుద్వేల్ లేఅవుట్ వైపు మళ్లింది.

ఓపెన్ మార్కెట్లో గజం ధర రూ. 1.50 లక్షల మార్కు వైపు..

హెచ్ఎండీఏ వేలం ప్రకటన త్వరలోనే రాబోతుందనే అంచనాలతో, బుద్వేల్ , దాని చుట్టుపక్కల ఉన్న ప్రైవేట్ వెంచర్లలో భూముల ధరలకు ఒక్కసారిగా రెక్కలు వచ్చాయి. స్థానిక హైపర్-లోకల్ మార్కెట్ నివేదికల ప్రకారం.. ఓపెన్ మార్కెట్లో ప్రస్తుతం గజం ధర రూ. 1.30 లక్షల నుండి ప్రారంభమై నాణ్యమైన లేఅవుట్లలో ఇప్పటికే రూ. 1.50 లక్షల వరకు పలుకుతోంది. రాబోయే వేలం ముగిసే సమయానికి ఈ ధరలు మరింత పెరిగి, కోకాపేట్ రికార్డులను సవాల్ చేసినా ఆశ్చర్యపోవాల్సిన అవసరం లేదని బ్రోకరేజ్ సంస్థలు అంచనా వేస్తున్నాయి. కేవలం భారీ బడ్జెట్ బిల్డర్లే కాకుండా, దీర్ఘకాలిక పెట్టుబడిదారులు కూడా ఈ జోన్ లో ఇన్వెస్ట్ చేయడానికి ఆసక్తి చూపుతున్నారు.

హై-రైజ్ బిల్డింగ్స్, లగ్జరీ విల్లాలకు కేరాఫ్ అడ్రస్

ప్రభుత్వం బుద్వేల్ పరిసరాల్లో అంతర్జాతీయ ప్రమాణాలతో కూడిన మౌలిక వసతులు, విశాలమైన రోడ్లు, తాగునీరు , విద్యుత్ లైన్ల మౌలిక సదుపాయాలను వేగంగా అభివృద్ధి చేస్తోంది. దీంతో ఈ ప్రాంతం రాబోయే రోజుల్లో స్కైస్క్రాపర్స్ , లగ్జరీ విల్లా ప్రాజెక్టులు , భారీ షాపింగ్ మాల్స్‌కు కేరాఫ్ అడ్రస్‌గా మారబోతోంది. పశ్చిమ హైదరాబాద్‌లోని ఇతర ప్రాంతాలతో పోలిస్తే ఇక్కడ గ్రీన్ జోన్లు, కాలుష్య రహిత వాతావరణం ఎక్కువగా ఉండటం కూడా ప్రీమియం కొనుగోలుదారులను ఆకర్షిస్తోంది. ఈ పరిణామాల నేపథ్యంలో, రాబోయే రోజుల్లో బుద్వేల్ రియల్ ఎస్టేట్ మార్కెట్ సరికొత్త రికార్డులను సృష్టించడం ఖాయంగా కనిపిస్తోంది.