నంద‌మూరి బాల‌కృష్ణ క‌ల‌ల ప్రాజెక్టు `న‌ర్త‌న‌శాల`. త‌న స్వీయ నిర్మాణంలోనే ఈ చిత్రాన్ని ప‌ట్టాలెక్కించాడు. భారీ కాస్టింగ్‌, బాల‌య్య ద‌ర్శ‌క‌త్వం, పౌరాణిక గాథ.. ఇవ‌న్నీ ఈ సినిమాపై ఆక‌ర్ష‌ణ‌ని పెంచాయి. కొంత‌మేర షూటింగ్ జ‌రిపారు కూడా. అయితే.. ప‌రిస్థితులు అనుకూలించ‌క ఈ సినిమా ఆగిపోయింది. ఇప్పుడు ఆ నర్తన శాల ఎలా ఉండేదో చూసే అవ‌కాశం బాల‌య్య అభిమానుల‌కు క‌లుగుతోంది. నర్తన శాల షూటింగ్ జ‌రుపుకున్న ఆ కొంత భాగాన్ని ఈనెల 24న విడుద‌ల చేస్తున్నారు. 17 నిమిషాల నిడివి గ‌ల కొన్ని స‌న్నివేశాల్ని చూపించ‌బోతున్నారు. ఈరోజు.. బాల‌య్య ఫ‌స్ట్ లుక్ కూడా వచ్చింది.
ఇందులో బాల‌కృష్ణ అర్జున పాత్ర‌ధారి. ఆయ‌న‌కు సంబంధించిన గెట‌ప్ ఇప్పుడు రివీల్ చేశారు. పౌరాణిక పాత్ర‌లు చేయ‌డంలో నంద‌మూరి హీరోలు కొట్టిన పిండి. కాబ‌ట్టి.. లుక్ ప‌రంగా బాగానే ఉంది. కాక‌పోతే.. పాత ఛాయ‌లు క‌నిపించాయి. సినిమా ఎప్ప‌టిదో క‌దా..? `ఇది పాత సినిమానే` అనిపించేలానే వుంది లుక్. `నర్తన శాల`లో ఏ ఎపిసోడ్ ని ఇప్పుడు చూపిస్తారో ఆస‌క్తిగా మారింది. 17 నిమిషాల నిడివి అంటే.. మ‌హా అయితే రెండు మూడు సీన్లు మాత్ర‌మే తీసి ఉంటారు. ఆ 17 నిమిషాలూ సినిమా చూసిన ఫీలింగ్ అయితే ఇవ్వ‌లేవు. ఎడిటింగ్ లో కొట్టుకుపోయిన స‌న్నివేశాల్ని మ‌ళ్లీ చూపిస్తుంటారు క‌దా. అలాంటి అనుభ‌వ‌మైతే క‌లుగుతుంది.
