ఈ సంక్రాంతికి బంగార్రాజు రావ‌డం ఫిక్స‌యిపోయింది. అయితే డేట్ లో క్లారిటీ రావాల్సివుంది. జనవరి 12న ఈ సినిమాని విడుద‌ల చేద్దామ‌నుకుంటున్నారు. ఆ డేట్ త‌ప్పితే… జనవరి 14న వ‌చ్చేస్తుంది. రేపు హైద‌రాబాద్ లో బంగార్రాజు ప్రెస్ మీట్ ఉంది. ఈ ప్రెస్ మీట్ లో రిలీజ్ డేట్ ని అధికారికంగా ప్ర‌టించ‌బోతున్నారు. నిజానికి ముందు నుంచీ బంగార్రాజుని పండ‌గ సినిమాగానే భావిస్తున్నారు. ఎందుకంటే.. సోగ్గాడే చిన్ని నాయిన సంక్రాంతికే విడుద‌లైంది. నాగ్ కెరీర్ లో అత్య‌ధిక వ‌సూళ్లు చేసిన చిత్రంగా రికార్డు సృష్టించింది. దానికి ప్రీక్వెల్ గా రూపొందిన బంగార్రాజుని కూడా సంక్రాంతికే విడుద‌ల చేయాల‌ని ప్లాన్‌. అయితే.. ఆర్.ఆర్.ఆర్, రాధేశ్యామ్ మ‌ధ్య బంగార్రాజుని విడుద‌ల చేయడం రిస్క్‌. కాబ‌ట్టి.. రిలీజ్ డేట్ ఎనౌన్స్ చేయ‌లేదు. ఎప్పుడైతే ఆర్.ఆర్.ఆర్ త‌ప్పుకుందో, అప్పుడు బంగార్రాజుకి ఛాన్స్ దొరికిన‌ట్టైంది. మిగిలిన పోస్ట్ ప్రొడ‌క్ష‌న్ ప‌నుల్ని చ‌క చ‌క అవ‌గొట్టి.. ఈ సినిమాని ఎట్టి ప‌రిస్థితుల్లోనూ సంక్రాంతికే విడుద‌ల చేయాల‌ని చిత్ర‌బృందం అహ‌ర్నిశ‌లూ క‌ష్ట‌ప‌డుతోంది. అనూప్ రూబెన్స్ ఆర్.ఆర్. వ‌ర్క్ పూర్త‌యిపోయింది. సీజీ వ‌ర్క్ అక్క‌డ‌క్క‌డ మిగిలి వుంది. మరో మూడు రోజుల్లో అవి కూడా పూర్త‌యిపోయి ఫ‌స్ట్ కాపీ చేతికి వ‌చ్చేస్తుంది. జనవరి 14న రాధే శ్యామ్ రావాలి. రాధే శ్యామ్ వ‌స్తే.. జనవరి 12న బంగార్రాజు వ‌స్తాడు. లేదంటే… 14న దిగిపోతాడు. రావ‌డం మాత్రం ప‌క్కా.
జనవరి 12 లేదా 14న … బంగార్రాజు
