2025 సంవత్సరం ఆఖరి త్రైమాసికంలో దేశీయ బ్యాంకింగ్ రంగం గృహ రుణ గ్రహీతలకు తీపి కబురు అందించింది. ప్రముఖ ప్రభుత్వ, ప్రైవేట్ బ్యాంకులు గృహ రుణాలపై వడ్డీ రేట్లను స్వల్పంగా తగ్గించడమే కాకుండా, అనేక ఆకర్షణీయమైన ఆఫర్లను ప్రకటించాయి. ముఖ్యంగా ప్రాసెసింగ్ ఫీజు మినహాయింపు, తక్కువ వడ్డీ రేటు , మహిళా రుణ గ్రహీతలకు అదనపు రాయితీలు వంటి చర్యలు మధ్యతరగతి ప్రజలను ఇళ్ల కొనుగోలు వైపు మొగ్గు చూపేలా చేస్తున్నాయి.
బ్యాంకులు ప్రకటించిన ఈ ప్రత్యేక ‘ఇయర్ ఎండ్’ ఆఫర్ల ప్రభావం రియల్ ఎస్టేట్ రంగంపై స్పష్టంగా కనిపిస్తోంది. గత నెల రోజుల్లో దేశవ్యాప్తంగా మధ్యతరగతి ఇళ్లు అంటే రూ. 40 లక్షల నుండి రూ. 80 లక్షల లోపు అమ్మకాలు 10 శాతం మేర వృద్ధి చెందాయి. సాధారణంగా అద్దె ఇళ్లలో ఉండేవారు, వడ్డీ రేట్లు తగ్గడం వల్ల వచ్చే ఈఎంఐ భారం అద్దెతో సమానంగా ఉంటుందని భావించి సొంత ఇళ్ల కొనుగోలుకు ప్రాధాన్యత ఇస్తున్నారు. ఇది కేవలం మెట్రో నగరాల్లోనే కాకుండా, టైర్-2 నగరాల్లో కూడా స్పష్టంగా కనిపిస్తోంది.
రియల్ ఎస్టేట్ డెవలపర్లు కూడా బ్యాంకుల ఆఫర్లకు అనుగుణంగా తమ విక్రయ వ్యూహాలను మార్చుకున్నారు. “రెడీ-టు-మూవ్” ( ఇళ్లకు డిమాండ్ ఎక్కువగా ఉండటంతో, బిల్డర్లు ఉచిత పార్కింగ్, క్లబ్ హౌస్ మెంబర్షిప్ వంటి అదనపు ఆకర్షణలను జోడిస్తున్నారు. బ్యాంకులు నేరుగా ప్రాజెక్ట్ సైట్ల వద్దే ‘లోన్ మేళాలు’ నిర్వహించడం ద్వారా రుణ మంజూరు ప్రక్రియను మరింత వేగవంతం చేశాయి. దీనివల్ల డాక్యుమెంటేషన్ ఇబ్బందులు తగ్గి, కొనుగోలుదారులకు భరోసా కలుగుతోంది.
జనవరి వరకు ఈ ఆఫర్లు అందుబాటులో ఉండవచ్చని బ్యాంకింగ్ వర్గాలు పేర్కొంటున్నాయి. దీంతో గృహ రుణాల కోసం అప్లికేషన్లు వెల్లువలా వస్తున్నాయి. డిజిటల్ బ్యాంకింగ్ ద్వారా తక్షణ రుణ అనుమతులు లభిస్తుండటంతో, యువ ఉద్యోగస్థులు సైతం ఇన్వెస్ట్మెంట్ పరంగా ఇళ్ల కొనుగోలుకు ఆసక్తి చూపుతున్నారు.
