నంద‌మూరి బాల‌కృష్ణ – బోయ‌పాటి శ్రీ‌ను కాంబినేష‌న్‌లో ఓ చిత్రం తెర‌కెక్కుతున్న సంగ‌తి తెలిసిందే. ఈపాటికే ఈ సినిమా షూటింగ్ ప్రారంభం కావాల్సింది. అయితే… అనివార్య కార‌ణాల వ‌ల్ల ఆల‌స్యం అయ్యింది. ఈ సినిమా బడ్జెట్ విష‌యంలోనూ ద‌ర్శ‌క నిర్మాత‌లు త‌ర్జ‌న భ‌ర్జ‌న‌లు ప‌డుతున్న‌ట్టు చెప్పుకున్నారు. ఈ క‌థ‌కు రూ.70 కోట్ల బడ్జెట్ అవ‌స‌రమ‌ని బోయ‌పాటి చెప్పిన‌ట్టు, 40 కోట్ల‌లోపు సినిమాని పూర్తిచేయ‌మ‌ని నిర్మాత అడిగిన‌ట్టు వార్త‌లొచ్చాయి. `విన‌య‌విధేయ‌రామ` ఎఫెక్ట్ వ‌ల్లే ఈ సినిమా బడ్జెట్ త‌గ్గ‌బోతోంద‌ని అనుకున్నారు. అయితే బోయ‌పాటి శ్రీ‌ను మాత్రం బడ్జెట్ రూపాయి కూడా త‌గ్గించ‌డానికి ఒప్పుకోవ‌డం లేద‌ట. ఈ సినిమాకి 70 కోట్లు ఖ‌ర్చు పెట్టాల్సిందేన‌ని, లేదంటే క్వాలిటీ రాద‌ని నిర్మాత‌కి గ‌ట్టిగా చెప్పాడ‌ట. త‌ప్ప‌నిస‌రి ప‌రిస్థితుల్లో నిర్మాత కూడా బోయ‌పాటి కండీష‌న్‌కి ఒప్పుకున్న‌ట్టు స‌మాచారం. బోయ‌పాటి సినిమాల్లో యాక్ష‌న్ మోతాదు ఎక్కువ‌గా ఉంటుంది. అందుకోస‌మే భారీగా ఖ‌ర్చు పెడుతుంటాడు. ఈ సినిమాలోనూ యాక్ష‌న్ సీన్లు ఎక్కువే ఉన్నాయ‌ని, అందుకే బడ్జెట్ ఈ స్థాయిలో కావాల్సివ‌చ్చింద‌ని తెలుస్తోంది. టెక్నిక‌ల్ టీమ్ విష‌యంలోనూ బోయ‌పాటి ఏమాత్రం రాజీ ప‌డ‌డు. అందుకే బ‌డ్జెట్‌ప‌రిధులు దాటుతుంటుంది. సింహా, లెజెండ్ టైపులో ఈ సినిమా కూడా హిట్ట‌యితే.. రూ.70 కోట్లు రాబ‌ట్టుకోవ‌డం పెద్ద విశేష‌మేమీ కాదు. అప్ప‌టితో పోలిస్తే ఇప్పుడు డిజిట‌ల్, శాటిలైట్‌, హిందీ డ‌బ్బింగ్ రైట్స్ బాగా పెరిగాయి. బోయ‌పాటి న‌మ్మ‌కం కూడా వీటిపైనే.
70 కోట్ల‌కు రూపాయి త‌గ్గ‌నంటున్న బోయ‌పాటి
