ఆంధ్రప్రదేశ్ పేరును వైఎస్ఆర్ ప్రదేశ్‌గా మార్చేస్తే ఎలాంటి సమస్యా ఉండదని సీబీఐ మాజీ డైరక్టర్ మన్నెం నాగేశ్వరరావు ఏపీ సీఎం జగన్‌కు సలహా ఇచ్చారు. కోనసీమ జిల్లా పేరు మార్పుపై ఆందోళనలు విస్తృతంమైన తరుణంలో ఆయన ట్విట్టర్‌లో ఈ అంశంపై కీలక వ్యాఖ్యలు చేశారు. తెలుగును ఓ తెగులుగా భావించి దానిని పీకి పార వేస్తున్నాం కాబట్టి, రాష్ట్రానికి “YSR Land” అనే ఇంగ్లీషు పేరు పెడితే మరీ భేషుగ్గా ఉంటుందని కూడా చెప్పారు.
ఇప్పటికే కడప పేరును తొలగించి పూర్తిగా వైఎస్ఆర్ జిల్లా అని మార్చేశారు. పలు జిల్లాలకు ఇతర వ్యక్తుల పేర్లు పెట్టారు. అందుకే మన్నెం నాగేశ్వరరావు ఈ కామెంట్స్ చేసినట్లుగా తెలుస్తోంది. తెలుగువ్యక్తి అయిన మన్నెం నాగేశ్వరరావు ఒరిస్సా క్యాడర్ ఐపీఎస్ అధికారి. ఆయన కేంద్ర సర్వీసుల్లో కొన్ని హఠాత్ పరిణామాల మధ్య సీబీఐ డైరక్టర్ అయ్యాడు. అవమానకరంగా బదిలీ అయ్యాడు . తర్వాత రిటైరయ్యారు. ఇప్పుడు ఆయన ట్విట్టర్‌లో హిందూత్వ వాదం వినిపిస్తూ వివాదాస్పద అంశాలపై ట్వీట్లు చేస్తున్నారు.
ఇటీవల ట్విట్టర్‌పై కోర్టుకెళ్లి చీవాట్లు తిన్నాడు. ఆయన వివాదాస్పద వ్యాఖ్యలు చేస్తూండటంతో.. వెరీఫైడ్ అకౌంట్ హోదాను ట్విట్టర్ తొలగిచింది. బ్లూటిక్ తీసేయడంతో ఆయన ఢిల్లీ హైకోర్టులో పిటిషన్ వేశారు. ఓ సారి ఉత్తర్వులు ఇచ్చినా మళ్లీ ఆయన కోర్టులో పిటిషన్ వేశారు. దీంతో కోర్టు ఆగ్రహం వ్యక్తం చేసి ఆయనకు జరిమానా విధించింది. మన్నెం నాగేశ్వరరావు తెలుగు రాష్ట్రాల విషయంలో ఎక్కువగా వ్యాఖ్యలు చేయరు. కానీ ఇప్పుడు నేరుగా జగన్ ప్రభుత్వాన్ని గురి పెట్టారు.
