చిరు మాస్ లుక్ … అరాచ‌కం ఆరంభం

చిరంజీవి ఫుల్ స్వింగ్ లో ఉన్నాడు. ఆచార్య ప‌నులు ముగించి `గాడ్ ఫాద‌ర్‌`ని ప‌ట్టాలెక్కించాడు. మ‌రోవైపు భోళా శంక‌ర్ ఉండ‌నే ఉంది. ఇప్పుడు బాబితో సినిమానీ ప‌రుగులు పెట్టించే ప‌నిలో ఉన్నాడు. బాబి ద‌ర్శ‌క‌త్వంలో చిరు ఓ సినిమా చేస్తున్న సంగ‌తి తెలిసిందే. మైత్రీ మూవీస్ నిర్మిస్తోంది. `పూన‌కాలు లోడింగ్‌` అంటూ.. చిరు పుట్టిన రోజున ప్రీ లుక్ వ‌దిలారు. ఇప్పుడు పూర్తి లుక్ బ‌య‌ట పెట్టారు. క‌ళ్ల‌కు చ‌లువ అద్దాలు, నోట్లో బీడీ, చేతిలో లైట‌ర్ తో.. మాసీ మాసీగా క‌నిపించాడు మెగాస్టార్‌. నిజంగా ఫ్యాన్స్‌కి ఇది పూన‌కాలు తెప్పించే మూమెంటే. “బాబీ చిరంజీవికి వీరాభిమాని.. ఓ ఫ్యాన్ త‌న హీరోని ఎలా చూడాల‌నుకుంటాడో, అలా చిరంజీవిని ఈ సినిమాలో చూపించ‌బోతున్నారు“ అని మైత్రీ మూవీస్ చెబుతోంది. చిరు న‌టించే 154వ సినిమా ఇది. దేవిశ్రీ ప్ర‌సాద్ సంగీతం అందిస్తున్నారు. `వాల్తేరు శీను` అనేది వ‌ర్కింగ్ టైటిల్. ఇదే ఫిక్స్ కావొచ్చు కూడా. ఈ సినిమా టైటిల్ ని కూడా ఇదే రోజు ప్ర‌క‌టిస్తార‌ని అంతా అనుకున్నారు. కానీ.. టైటిల్ విష‌యంలో ఇంకొంచెం టైమ్ తీసుకోవాల‌నుకుంటున్నాడు బాబి. మ‌రో మంచి ముహూర్తం చూసి, టైటిల్ ని వ‌దిలే అవ‌కాశం వుంది.