ముఖ్యమంత్రి రేవంత్ రెడ్డి 2034 వరకు సీఎంగా కొనసాగుతానని సందర్భం వచ్చినప్పుడల్లా చెబుతున్నారు. పార్టీ గెలుస్తుందని చెప్పడం లేదు. తాను సీఎంగా ఉంటానని చెబుతున్నారు. దీనికి ఆయన చెప్పే కారణం కూడా ఆసక్తికరంగా ఉంటుంది. సాధారణంగా ప్రజలు ఏ పార్టీకైనా పదేళ్ల పాటు అవకాశం ఇస్తారని, టీడీపీ, కాంగ్రెస్, గతంలో బీఆర్ఎస్ హయాంలను ఉదాహరణగా చూపుతూ ఆయన తన టూ-టర్మ్ లాజిక్ను వివరిస్తున్నారు.
2029లో ఎన్నికలు జరిగినా, ప్రజలు మరోసారి కాంగ్రెస్కే పట్టం కడతారని, తద్వారా పదేళ్ల పాలన పూర్తవుతుందనేది ఆయన నమ్మకం. ప్రజాస్వామ్యంలో సెంటిమెంట్లు లేదా గత చరిత్ర ఎప్పుడూ ఒకేలా పని చేయవు. ఓటర్ల తీర్పు అనేది కేవలం కాలక్రమ సమీకరణాల మీద కాకుండా, ప్రస్తుత ప్రభుత్వ పనితీరు, హామీల అమలు, క్షేత్రస్థాయిలో ప్రజల్లో ఉన్న సంతృప్తిపై ఆధారపడి ఉంటుంది. పదేళ్ల పాటు అధికారం దక్కుతుందనే ధీమా ఒక్కోసారి పాలకుల్లో అతివిశ్వాసం కలిగించే ప్రమాదం ఉంటుంది.
గతంలో బీఆర్ఎస్ కూడా ముచ్చటగా మూడోసారి గెలుస్తామని ధీమాగా ఉన్నప్పటికీ, ప్రజలు ప్రత్యామ్నాయం వైపు మొగ్గు చూపిన విషయాన్ని గుర్తు చేసుకోవచ్చు. 2034 వరకు లక్ష్యాలను నిర్దేశించుకుని ఫ్యూచర్ సిటీ వంటి భారీ ప్రాజెక్టులను ప్లాన్ చేయడం ఒక దార్శనికతగా కనిపించినప్పటికీ, అధికారం అనేది ఐదేళ్ల పరీక్ష అని మర్చిపోకూడదు. రాజకీయాల్లో ప్రతిరోజూ కొత్త సవాళ్లు ఎదురవుతాయి. సెంటిమెంట్లు ఎలా ఉన్నా, అంతిమంగా పాలన బాగుంటేనే ప్రజలు రెండోసారి అవకాశం ఇస్తారు. రేవంత్ రెడ్డి తన పదేళ్ల కలను సాకారం చేసుకోవాలంటే, ముందుగా ఈ ఐదేళ్లలో ప్రజల ఆకాంక్షలను ఏ మేరకు నెరవేరుస్తారనేదే కీలకం అవుతుందని విశ్లేషకుల భావన.
