నేను సీనియర్‌ని .. నాకెవరూ ప్రచారంచేయాల్సిన అవసరం లేదు.. నేనొక్కడినే చేసుకుంటానని భీష్మించుకు కూ‌ర్చున్న జానారెడ్డికి .. నాగార్జున సాగర్‌లో పరిస్థితి అర్థమైపోయింది. ఓ వైపు టీఆర్ఎస్ బలగం మొత్తాన్ని దించి గ్రామాలను చుట్టబెడుతోంది. మరో వైపు కేసీఆర్ కూడా ప్రచారానికి వస్తున్నారు. దీంతో జానారెడ్డి… తన పట్టు సడలించుకోక తప్పలేదు. సీనియర్ల ప్రచారానికి గ్రీన్ సిగ్నల్ ఇచ్చారు. దీంతో రేవంత్ సహా కీలకనేతలందరూ మండలాల వారీగా బాధ్యతలు తీసుకుని రంగంలోకి దిగారు. సాగర్ నియోజకవర్గంలో ఏడు మండలాలు..రెండు మున్సిపాల్టీలు ఉన్నాయి. వీటిలో నేటి నుంచి కాంగ్రెస్ నేతలు ప్రచారం చేయనున్నారు.
జానారెడ్డి ఇంతకు ముందు రెండు విధాలుగా ఆలోచించారు. ఒకటి.. ఉపఎన్నికల్లో ఎవరి సాయం లేకుండా గెలిస్తే… తెలంగాణ కాంగ్రెస్‌లో తనకంటే పోటుగాడు లేడన్న ఇమేజ్ వస్తుందని .. అలాగే… ఒక్క సారిగా కాంగ్రెస్‌లో కీలక స్థానానికి వెళ్లిపోవచ్చని ఆశపడ్డారు. అయితే అనుకున్నంత ఈజీగా పరిస్థితి లేదని తేలిపోయిన తర్వాత మెత్తబడాల్సి వచ్చింది. జానారెడ్డి సీనియర్ కావొచ్చు కానీ… ఇప్పుడు ఆయన రిటైర్మెంట్ దశలో ఉన్నారు. కుమారుడి ద్వారా రాజకీయాలు చేస్తున్నారు. ఇప్పుడు సీరియస్‌గా తీసుకోకపోతే.. చేతులు కాలిన తర్వాత ఆకులుపట్టుకున్న చందంగా అవుతుందన్న నిర్ణయానికి రావడంతో తన పట్టు సడలించారు.
జానారెడ్డి అంగీకరించడంతో ఎంపీ రేవంత్ రెడ్డి, సీఎల్పీ నేత భట్టి విక్రమార్క సహా పార్టీ పదవుల్లో ఉన్న వారు.. సీనియర్లు అందరూ ప్రచార బాధ్యతలు తీసుకున్నారు. వారిని మండలాల వారిగా ఇంఛార్జీలుగా నియమించారు. వీరికి మరో పదిమంది డీసీసీ అధ్యక్షులు, ఇతర ముఖ్య నాయకులను బృందంగా అప్పగించారు. సాగర్‌లో ప్రస్తుతం పరిస్థితి హోరాహోరీగా ఉంది.ఏ పార్టీకి మొగ్గు లేని పరిస్థితి కనిపిస్తోంది.
