ఆంధ్రప్రదేశ్ రాజధాని అమరావతి గడ్డపై కేంద్ర ప్రభుత్వం తన ముద్రను బలంగా వేస్తోంది. ఢిల్లీ వెలుపల కేంద్ర ప్రభుత్వ పరిపాలన వ్యవస్థ కోసం భారీ భవనాన్ని నిర్మించాలని నిర్ణయించింది. అమరావతిలో కామన్ సెంట్రల్ సెక్రటేరియట్ నిర్మాణానికి కేంద్ర ఆర్థిక శాఖ ఆమోదం తెలపడంతో, రాజధాని నిర్మాణ పనుల్లో సరికొత్త అధ్యాయం మొదలైంది. సుమారు రూ. 2,534 కోట్ల అంచనా వ్యయంతో చేపట్టనున్న ఈ ప్రాజెక్టు ద్వారా అమరావతిలో కేంద్ర సంస్థలన్నీ ఒకే చోట ఉండనున్నాయి.

ఈ మెగా ప్రాజెక్టును కేంద్ర ప్రభుత్వం రెండు ప్రధాన భాగాలుగా విభజించింది. కేంద్ర ప్రభుత్వానికి చెందిన వివిధ విభాగాల కార్యాలయాల కోసం రూ. 1,299.08 కోట్లు కేటాయించగా, అక్కడ పనిచేసే ఉద్యోగుల నివాస వసతుల కోసం మరో రూ. 1,234.91 కోట్లు వెచ్చించనున్నారు. రాజధాని ప్రాంతాభివృద్ధి ప్రాధికార సంస్థ ఇప్పటికే ఈ ప్రాజెక్టు కోసం 22.53 ఎకరాల కీలకమైన భూమిని కేటాయించింది. ఇందులో 5.53 ఎకరాల్లో పాలనా సౌధం, మిగిలిన 17 ఎకరాల్లో అత్యాధునిక బహుళ అంతస్తుల నివాస సముదాయాలు నిర్మితమవుతాయి.

ఈ ప్రాజెక్టులో భాగంగా HUDCO ఆధ్వర్యంలో 10 ఎకరాల్లో ఒక అంతర్జాతీయ స్థాయి కన్వెన్షన్ సెంటర్‌ను కూడా నిర్మించబోతున్నారు. ప్రపంచ స్థాయి సదస్సులు, గ్లోబల్ ఇన్వెస్టర్స్ మీటింగ్స్ నిర్వహించుకునేలా దీనిని డిజైన్ చేస్తున్నారు. కేంద్ర ప్రభుత్వ ప్రధాన కార్యాలయాలన్నీ ఒకే ప్రాంగణంలోకి రావడం వల్ల అమరావతికి అసలైన రాజధాని కళ రానుంది. ఇది కేవలం భవనాల నిర్మాణం మాత్రమే కాదు, ఈ ప్రాంతంలో భారీగా ఉపాధి అవకాశాలు పెరగడానికి, మౌలిక సదుపాయాల విస్తరణకు దోహదపడనుంది. ఢిల్లీ వెలుపల ఒక మోడ్రన్ పవర్ సెంటర్‌గా అమరావతిని నిలబెట్టాలనే కేంద్ర, రాష్ట్ర ప్రభుత్వాల ఉమ్మడి సంకల్పం ఈ ప్రాజెక్టుతో సాకారం కానుంది.