ఏపీ ఉప ముఖ్యమంత్రి, జనసేనాని పవన్ కల్యాణ్ లక్ష్యంగా వైసీపీ సానుభూతిపరులు దాఖలు చేస్తున్న పిటిషన్లను న్యాయస్థానాల్లో కొట్టేస్తున్నా పవన్ కల్యాణ్ సినిమాల్లో నటించకూడదంటూ వైఎస్సార్ కాంగ్రెస్ పార్టీకి అత్యంత సన్నిహితుడిగా ముద్రపడిన రిటైర్డ్ ఐఏఎస్ అధికారి విజయ్ కుమార్ దాఖలు చేసిన పిటిషన్ను న్యాయస్థానం తాజాగా కొట్టి వేసింది.
విజయ్ కుమార్ వంటి వారు గత ప్రభుత్వ హయాంలో కీలక పదవులు అనుభవించి, ఇప్పుడు జగన్ రెడ్డి వద్ద మార్కులు కొట్టేయడానికే ఇలాంటి వితండవాదాలతో కోర్టు మెట్లు ఎక్కుతున్నారనే విమర్శలు బలంగా ఉన్నాయి. ఒక వ్యక్తి రాజ్యాంగబద్ధమైన పదవిలో ఉంటూనే తన వృత్తిని కొనసాగించకూడదని ఏ చట్టం చెప్పడం లేదని గతంలోనే పలువురు న్యాయ నిపుణులు స్పష్టం చేశారు. అయినప్పటికీ, పవన్ను ఏదో ఒక రకంగా నిలువరించాలనే కుట్రతోనే ఇలాంటి పిటిషన్లు దాఖలవుతున్నాయి. తాజాగా కోర్టు ఇచ్చిన తీర్పుతో ఇలాంటి పబ్లిసిటీ స్టంట్లకు తెరపడినట్లయింది.
కేవలం సినిమాలపైనే కాకుండా, పవన్ కల్యాణ్ వ్యక్తిగత జీవితం, ఆయన వారాహి యాత్ర, ఎన్నికల అఫిడవిట్ వంటి అంశాలపై కూడా గతంలో వైసీపీ సానుభూతిపరులు అనేక పిటిషన్లు వేశారు. పవన్ కల్యాణ్ వారాహి వాహనం రంగుపై రచ్చ చేయడం, ఆయన ప్రసంగాలను అడ్డుకోవాలని కోరడం వంటి ప్రయత్నాలన్నీ విఫలమయ్యాయి. కోర్టులను ఒక రాజకీయ సాధనంగా వాడుకుంటూ ప్రత్యర్థులపై బురద జల్లాలనే వ్యూహం ఇప్పుడు బెడిసికొడుతోంది.
అధికార దాహం కోసం వ్యవస్థలను వాడుకోవడం ప్రజాస్వామ్యానికి చేటు చేస్తుందని ఈ ఉదంతం నిరూపిస్తోంది. పవన్ కల్యాణ్ పై చేస్తున్న ఈ నిరంతర దాడులు చివరకు ఆయనకే రాజకీయ మైలేజీని తెచ్చిపెడుతున్నాయి. జగన్ రెడ్డిని ప్రసన్నం చేసుకోవడానికి సామాన్యుల పక్షాన నిలబడకుండా, కేవలం వ్యక్తిగత ద్వేషంతో పిటిషన్లు వేసే వారికి ఈ తీర్పు ఒక గుణపాఠం కావాలన్న అభిప్రాయం వినిపిస్తోంది.
