వివాదాస్పద వ్యాఖ్యలకు పెట్టింది పేరు అయిన సీపీఐ నేత నారాయణ .. ఐబొమ్మ రవి విషయంలోనూ అలాంటి వ్యాఖ్యలే చేశారు. రవికి మద్దతుగా భారీ ప్రకటన చేశారు. తిరుపతిలో మీడియాతో మాట్లాడారు. ‘ఐబొమ్మ’ లో సినిమాలు ఫ్రీగా చూశానని .. ఆరేడు వందలు పెట్టి టిక్కెట్ కొనలేకనే సినిమాను అక్కడ చూశానన్నారు. సామాన్య ప్రజలు భారీ టికెట్ ధరలు చెల్లించలేకపోతున్నారని, పైరసీ సైట్‌లు అందకే పాపులర్ అవుతున్నాయన్నారు. ఎంతో తెలివైన ఐబొమ్మ రవి వంటి వ్యక్తులు వ్యవస్థలోని లోపాల వల్లే అలా మారుతున్నారన్నారు.

వ్యవస్థలో లోపాలు సరి చేయకుండా ఉంటే ఇలాంటి రవిలే పుట్టుకు వస్తారు… ఒక హిడ్మాను చంపితే వెయ్యి మంది హిడ్మాలు పుడతారని.. రవికి హిడ్మాకు లింక్ పెట్టారు. ఐబొమ్మ రవిని చంపడం లేదా జైల్లో పెట్టడం వల్ల మరో 100 మంది వస్తారని, ఇది సమస్యకు పరిష్కారం కాదని చెప్పారు. ఐ బొమ్మ రవి ని ఉరి వేస్తే ఎలాంటి ప్రయోజనం ఉండదు. సినిమా మాఫియాను ఉరి తీస్తే సమాజానికి ఉపయోజం ఉంటుంది అని చెప్పుకొచ్చారు.

కోట్లు ఖర్చు చేసి టికెట్ ధరలపై ఆడుకుంటున్నారని విమర్శించారు. టిక్కెట్ రేట్లను పెంచడానికి చాన్సిచ్చే ప్రభుత్వం సామాన్య ప్రజలను దోచుకోవడానికి సహాయపడుతోందా అని ప్రశ్నించారు. వ్యవస్థ మార్పు కోసం పోరాడాలని పిలుపునిచ్చారు. ఐ బొమ్మ రవికి పలువురు మద్దతుగా మాట్లాడుతున్నారు. ఆయన తప్పు చేసినట్లుగా అంగీకరించకుండానే…. అలా చేయడానికి టిక్కెట్ రేట్లే కారణం అంటున్నారు. ఆ జాబితాలోకి సీపీఐ నారాయణ చేరారు.