అమరావతి ఓ సేలబుల్ బ్రాండ్ గా మారిపోతోంది. కొద్ది రోజుల క్రితం.. స్టాక్ ఎక్సేంజ్ లో రూ. 1700 కోట్ల సేకరణకు బాండ్లు అమ్మకానికి పెడితే.. అరగంటలో రూ. 2 వేల కోట్లు వచ్చాయి. ఇప్పుడు సీఆర్డీఏ .. అపార్టుమెంట్లు కట్టి అమ్ముతామని ప్రకటించి.. బుకింగులు ప్రారంభించగానే… నిమిషాల్లోనే కొనేశారు. అమరావతిలోని నేలపాడు వద్ద 15 ఎకరాల్లో నిర్మించ తలపెట్టిన హ్యాపీనెస్ట్ గేటెడ్ కమ్యూనిటీ ప్రాజెక్ట్ లో ప్లాట్ ల బుకింగ్ కు దేశ విదేశాలలో ఉన్న తెలుగువారు విపరీతమైన ఆసక్తి చూపించారు. 50 వేల మంది ఒకేసారి సర్వర్ కు అనుసంధానమవుతారని అంచనా వేసి 100MBPS స్పీడుతో ఏర్పాటు చేసిన సర్వర్లు ఒకేసారి లక్షా 10వేల మంది అనుసంధానం కావడంతో యాక్సెస్ దొరకడం కష్టమయేంత డిమాండ్ వచ్చింది.
మొదటి ప్లాట్ ను బెంగుళూరులో ఉన్న యం.కృష్ణతేజ తొలి 42 సెకన్లకే బుక్ చశారు. రెండో ప్లాట్ ను గుంటూరుకు చెందిన యడ్లపాటి అమర్ నాధ్ 9గంటల03నిమిషాలకు బుక్ చేశారు. సర్వర్ కి యాక్సిస్ దొరకకపోవడంతో అనేకమంది సి.ఆర్.డి.ఎ కార్యాలయాలకు ఫోన్లు చేశారు. మధ్యాహ్నం రెండు గంటల సమయాని కల్లా ప్లాట్లన్నీ బుక్ అయిపోయాయి. సి.ఆర్.డి.ఎ అమ్మకానికి ఉంచిన ప్లాట్లను విదేశాలలో ఉన్న వారు ఎక్కువుగా కొనుగోలు చేశారు. సీఆర్డీఏ ఆఫీసులు వచ్చి బుక్ చేసుకోవాలనుకున్న వారికి నిరాశే మిగిలింది. హెల్ప్ డెస్క్ లలో మూడు ఫ్లాట్లు మాత్రమే బుక్ చేయగలిగారు. మొత్తం ప్లాట్లు బుకింగ్ పూర్తి కావడంతో ఈ నెల 15వ తేదీన మరో మూడు వందల ప్లాట్లు బుకింగ్ కోసం ఉంచబోతున్నారు.
సాంకేతిక సమస్యలు లేకుండా ఈసారి యాక్సిస్ సులభంగా దొరికేందుకు ఏర్పాట్లు చేస్తున్నామని, సర్వర్ సామర్ధ్యాన్ని కూడా ఒకేసారి రెండు లక్షల మంది చూసేందుకు వీలుగా పెంచుతున్నారు. డిసెంబర్ నాటికి మొత్తం 1200 ప్లాట్ల బుకింగ్ ప్రక్రియను పూర్తి చేసి వెంటనే నిర్మాణం చేపడతామని, 24నెలల్లో నిర్మాణం పూర్తి చేసి అప్పగిస్తామని సీఆర్డీఏ అధికారులు చెబుతున్నారు. ఇంత స్పందనను ఊహించలేకపోయామని సీఆర్డీఏ అధికారులు ఆనందంతో ఉన్నారు. చంద్రబాబుపై నమ్మకం వల్లే.. అమరావతికి ఇంత క్రేజ్ వచ్చిందంటున్నారు.
