‘గీత గోవిందం’ తో వ‌చ్చిన క్రేజ్‌ని కాపాడ‌లేక‌పోతున్నాడు పరశురామ్. ‘స‌ర్కారు వారి పాట’ ద్వారా మహేష్ బాబు తో ప‌ని చేసే అవ‌కాశం వ‌చ్చింది. కాక‌పోతే ఆ సినిమా ఎబౌ ఏవ‌రేజ్ మార్క్ ద‌గ్గ‌రే ఆగిపోయింది. క‌థ‌కుడిగా ఆ సినిమాలో మైన‌స్ మార్కులు ప‌డ్డాయి. ఇప్పుడు ‘ఫ్యామిలీ స్టార్’ విష‌యంలోనూ తేలిపోయాడు. ఈ సినిమాకు క‌నీసం వ‌సూళ్లు కూడా రాలేదు. దాంతో పరశురామ్ ప‌రిస్థితి ఏమిటా? అనే సందేహాలు వ్య‌క్తం అవుతున్నాయి. పరశురామ్ ద‌గ్గ‌ర `రెంచ్ రాజు` అనే ఓ క‌థ ఉంది. దాన్ని కార్తీతో చేయాల‌ని ఆలోచ‌న. ‘ఫ్యామిలీ స్టార్’ హిట్ట‌యితే, త‌ప్ప‌కుండా కార్తితో కాంబినేష‌న్ సెట్ట‌య్యేదే. కానీ అలా జ‌ర‌గ‌లేదు. దాంతో కార్తి సినిమా డైలామాలో ప‌డింది.
అయితే దిల్ రాజు మాత్రం పరశురామ్ కు అభ‌య‌హ‌స్తం ఇచ్చిన‌ట్టు తెలుస్తోంది. ‘ఫ్యామిలీ స్టార్’ రిజ‌ల్ట్ తో సంబంధం లేకుండా పరశురామ్ తో మ‌రో సినిమా చేస్తాన‌ని ముందే మాటిచ్చాడ‌ట దిల్ రాజు. `రెంచ్ రాజు` క‌థ కార్తి ఓకే అన్నా, లేకున్నా – ఈ క‌థ‌కు సెట్ట‌య్యే మ‌రో హీరోని తెచ్చుకొంటే, దిల్ రాజు బ్యాన‌ర్‌లో పరశురామ్ సినిమా ఉంటుంది. దిల్ రాజు బ్యాన‌ర్ అంటే… ఏ హీరో అయినా, ఆలోచించ‌కుండా దూకేస్తాడు. దాంతో…. ‘రెంచ్ రాజు’పై పరశురామ్ న‌మ్మ‌కంతో ఉన్నాడు. `ఫ్యామిలీ స్టార్` కోసం పరశురామ్ రూ.14 కోట్ల పారితోషిం అందుకొన్నాడ‌ని ఇన్ సైడ్ వ‌ర్గాలు చెబుతున్నాయి. ఈసారి మాత్రం అందులో స‌గం ఇచ్చినా సంతోష‌మే!
