దర్శకుడు పెద్ద వంశీ కథల్లో కొసమెరపులు భలే గమ్మత్తుగా వుంటాయి. చివర్లో ఆయన ఇచ్చే ట్విస్ట్ కొన్నిసార్లు కన్నీళ్లు తెప్పిస్తుంది, ఇంకొన్ని సార్లు హాయిగా నవ్వించేసి మనసుని తేలిక చేసేస్తుంది. తాజాగా ఆయన చెప్పిన ఓ ప్రేమకథ భలే ముచ్చటగా వుంది. ‘శంకరాభరణం’ షూటింగ్ జరుగుతున్న రోజులవి. ఆ సినిమాకి వంశీ సహాయ దర్శకుడు. దర్శకుడు ఈవీవీ సత్యనారాయణ అప్పటికి స్టిల్ కెమెరామెన్. ఇద్దరూ మంచి స్నేహితులు. మద్రాస్ లో పక్కపక్క పోర్షన్స్ లో వుండేవారు.
రాజమండ్రి రఘుదేవపురంలో శంకరాభరణం షూటింగ్ జరుగుతోంది. వంశీ, ఈవీవీ ఇద్దరూ ఆ షెడ్యుల్ లో పని చేసేవారు. ఆక్కడ షూటింగ్ జరుగుతునన్ని రోజులు లొకేషన్ కి ఓ అమ్మాయి వచ్చేదట. ఆ అమ్మాయిని చూసిన వంశీకి మనసులో ఎదో రకంగా అయిపోయేదట. ప్రతి రోజు ఆ అమ్మాయి కోసం ఎదురుచూడటం ఒక దినచర్యగా మారిందట. ఒకసారి ఆ అమ్మాయి వంశీని చూసి నవ్విందట. ఇంక ఆయన థ్రిల్ కి హద్దు లేదు.
ఒకరోజు లంచ్ చేస్తున్నపుడు ఆ అమ్మాయి పేరు ‘వీరలక్ష్మీ’ అని తెలుసుకున్నారట వంశీ. అన్నీ విషయాలు ఈవీవీ తో పంచుకునే వంశీ ఈ విషయాన్ని మాత్రం చెప్పలేదట. ఆవేళ ఆ వూర్లో షూటింగ్ ఆఖరి రోజు. మొదటిసారిగా వీరలక్ష్మీ, వంశీ దగ్గరికి వచ్చి ‘రేపటి నుంచి షూటింగ్ వుండదట. మీరెవరూ ఇంక రారట’ అని కన్నీళ్లు పెట్టుకుంది. దీంతో వంశీ గుండె పగిలినంత పనైపోయింది. వ్యాన్ ఎక్కి రాజమండ్రి వెళ్ళిపోతున్న వంశీని చూసి మేడెక్కి ఏడుస్తూ చేయి ఊపిందట వీరలక్ష్మీ. దీంతో వంశీ పని అదోరకంగా అయిపోయిందట.
కొసమెరపు: ఆ రోజు రాత్రి మందు తెచ్చుకొని తాగుతున్నారు ఈవీవీ. తనకూ పెగ్గు పోయామని అడిగారు వంశీ. కాస్త పెద్ద పెగ్గే పోశారు ఈవీవీ. అంతకుముందు అలవాటు లేని వంశీ గబగబా తాగేశారు. సైలెంట్ గా వంశీ వంక చూసిన ఈవీవీ ‘’ ఈవేళ నా మనసేం బాలేదు వంశీ’ అన్నారు.
‘ఎందుకని’ అడిగారు వంశీ.
‘’రఘుదేవపురంలో ఒక అమ్మాయిని ప్రేమించానయ్యా. నా కంటే ఎక్కువగా ప్రేమించింది తను’ అన్నారు ఈవీవీ
‘అవునా.. ఎవరామ్మాయి? అడిగారు వంశీ
‘ఎవరో తెలియదు కానీ… పేరు.. వీరలక్ష్మీ’ ఇది ఈవీవీ అన్సర్.
ఈ సమాధానం విన్న వంశీ… అదోలా ఉండిపోయి… ఇంకో పెగ్గు లేపేశారు.
