ఇప్పుడు డబ్బులు పోగొట్టుకోవాలంటే.. దోపిడీకి గురవ్వాలంటే ఇంటి తాళాలు తీసి పెట్టి పోవాల్సిన పని లేదు. వాట్సాప్ లో లేకపోతే మెసెంజర్ లో వచ్చే హాయ్ అనే మెసెజ్‌కు స్పందించినా చాలు. మొత్తం గుల్ల అయిపోతారు. దానికి సాక్ష్యమే ఎర్రగడ్డకు చెందిన ఈ డాక్టర్.
ఎర్రగడ్డ, ప్రేమ్‌నగర్‌కు చెందిన డెంటల్ డాక్టర్ కు ఫేస్‌బుక్ మెసెంజర్‌లో మౌనిక అనే ప్రొఫైల్ నుంచి ఫ్రెండ్ రిక్వెస్ట్ వచ్చింది. ఆమె ప్రొఫైల్‌లో హైదరాబాద్‌కు చెందిన ఒంటరి మహిళ అని ఉంది. ఇదే మంచి చాన్స్ అనుకున్న డాక్టర్ చాటింగ్ ప్రారంభించాడు. తర్వాత ఆమె కొంత డబ్బు సాయం అడిగింది. చేశాడు. ఆమె భారీగా తిరిగి ఇచ్చింది. తనకు క్రిప్టో కరెన్సీ ట్రేడింగ్‌లో భారీ లాభాలు వచ్చాయని చెప్పింది.
మీరు కూడా పెట్టండి అని చెప్పడంతో డాక్టర్ కూడా ఆమె చెప్పిన నకిలీ వెబ్‌సైట్‌లో ట్రేడింగ్ అకౌంట్ ఓపెన్ చేశాడు. సెప్టెంబర్ 30న మొదటి పెట్టుబడిగా రూ.5 లక్షలు పెట్టాడు. మౌనిక, టెలిగ్రామ్ వంటి ప్లాట్‌ఫామ్‌ల ద్వారా క్రిప్టో ట్రేడింగ్ లావాదేవీలు నిర్వహించినట్టు చూపించింది. డాక్టర్ పెట్టుబడులు పెంచుతున్నకొద్దీ, అకౌంట్ బ్యాలెన్స్ పెరుగుతున్నట్టు స్క్రీన్‌షాట్‌లు, ఫేక్ రిపోర్టులు పంపింది. మొత్తం 91 లావాదేవీల ద్వారా డాక్టర్ నుంచి మొత్తం రూ.14 కోట్ల 60 లక్షలు తీసుకున్నారు. విడతల వారీగా మరిన్ని మొత్తాలు పెట్టుబడి పెట్టమని చెప్పి, ట్రేడింగ్ వాలెట్ బ్యాలెన్స్ రూ.34 కోట్లకు చేరుకున్నట్టు చూపించారు.
డబ్బులు విత్‌డ్రా చేసుకోవాలని డాక్టర్ అడిగినప్పుడు లాభాలు విత్‌డ్రా చేసుకోవాలంటే 50% ట్యాక్స్ చెల్లించాలి.. లేకపోతే అకౌంట్ ఫ్రీజ్ అవుతుంది అని మౌనిక బెదిరించింది. డాక్టర్ మరో 20 లక్షలు కూడా ఇచ్చాడు. కానీ డబ్బులు రాలేదు సరికదా.. మౌనిక కూడా ఆఫ్ లైన్ కు వెళ్లిపోయింది. డాక్టర్ మోసపోయానని అప్పుడు అర్థమైంది. వెంటనే పోలీసుల్ని సంప్రదించారు. పోలీసులు రూ.1.20 కోట్లు మాత్రమే ఫ్రీజ్ చేయగలిగారు.
