ఈ సంక్రాంతికి రావాల్సిన సినిమా ఎఫ్ 3. క‌రోనా కాటుకి ఈ సినిమా కూడా ఆగిపోయింది. స్క్రిప్టు సిద్ధ‌మైనా.. ప‌ట్టాలెక్కించ‌లేని ప‌రిస్థితి. ఎట్ట‌కేల‌కు…. ఇటీవ‌లే లాంఛ‌నంగా ప్రారంభ‌మైంది. రెగ్యుల‌ర్ షూటింగ్ కి అంతా రెడీ. ఇప్పుడు `ఎఫ్ 3` టార్గెట్ ఫిక్స‌యిపోయింది. ఈ వేస‌వికే `ఎఫ్ 3`ని విడుద‌ల చేయాల‌ని దిల్ రాజు ఫిక్స‌య్యార్ట. అందుకు త‌గ్గ‌ట్టే.. చిత్రీక‌ర‌ణ వేగ‌వంతం చేయాల‌ని అనిల్ రావిపూడి భావిస్తున్నాడు. వెంక‌టేష్‌, వ‌రుణ్‌తేజ్ క‌థానాయ‌కులుగా న‌టిస్తున్న చిత్ర‌మిది. త‌మ‌న్నా, మెహ‌రీన్ క‌థానాయిక‌లు. మూడు నెల‌ల్లో షూటింగ్ పూర్తి చేయాల‌న్న‌ది ద‌ర్శ‌క నిర్మాత‌ల టార్గెట్. ఏప్రిల్ లో పోస్ట్ ప్రొడ‌క్ష‌న్ పూర్తి చేసి, మే నాటికి సిద్ధం చేయాల‌ని భావిస్తున్నారు. ఫ్యామిలీ సినిమాల‌కు సంక్రాంతి మంచి ఆప్ష‌న్‌. ఆ త‌ర‌వాత వేస‌వే. ఈ సంక్రాంతికి ఎలాగూ `ఎఫ్ 3` మిస్స‌య్యింది. అందుకే వేస‌విని ల‌క్ష్యంగా చేసుకుంది. అనిల్ రావిపూడి తీత స్పీడుగానే ఉంటుంది. పైగా ఎఫ్ 3లో ఫైటింగులు, ఛేజింగులు గ‌ట్రా ఉండ‌వు. కాబ‌ట్టి… ఈజీగానే లాగించేయొచ్చు.
ఎఫ్ 3.. టార్గెట్ ఫిక్స్‌
