ఆంధ్రప్రదేశ్ రాష్ట్రానికి మంజూరు అయిన ఆల్ ఇండియా మెడికల్ ఇన్స్టిట్యూట్ అఫ్ మెడికల్ సైన్సస్ (ఎయిమ్స్) ఆసుపత్రికి నేడు గుంటూరు జిల్లాలోని మంగళగిరిలో శంఖుస్థాపన చేయబోతున్నారు. కేంద్ర వైద్య ఆరోగ్య శాఖ మంత్రి జగత్ ప్రకాశ్ నడ్డా ఈ సూపర్ స్పెషాలిటీ ఆసుపత్రికి ఉదయం 11 గంటలకు శంఖుస్థాపన చేస్తారు. మంగళగిరిలో ఉన్న ప్రభుత్వ టీబీ ఆసుపత్రికి చెందిన 193 ఎకరాలలో దీనిని నిర్మించబోతున్నారు. ఈ కార్యక్రమంలో ముఖ్యమంత్రి చంద్రబాబు నాయుడు, కేంద్ర పట్టణాభివృద్ధి శాఖా మంత్రి ఎం. వెంకయ్య నాయుడు, రాష్ట్ర వైద్య, ఆరోగ్య శాఖ మంత్రి డా.కామినేని శ్రీనివాస్ అనేక మంది రాష్ట్ర మంత్రులు, తెదేపా, బీజేపీలకు చెందిన ప్రజా ప్రతినిధులు పాల్గొనబోతున్నారు. శంఖుస్థాపన అనంతరం అక్కడే బహిరంగ సభ జరుగుతుంది. మూడేళ్ళలో ఈ ఆసుపత్రి నిర్మాణం పూర్తి చేయాలనీ లక్ష్యంగా పెట్టుకొన్నట్లు మంత్రి డా. కామినేని శ్రీనివాస్ తెలిపారు.
నేడు మంగళగిరిలో ఎయిమ్స్ ఆసుపత్రికి శంఖుస్థాపన
