తెలుగు రాష్ట్రాల మధ్య జల పంచాయతీ తీర్చాలనుకున్న కేంద్రానికి ఏదీ కలసి రావడం లేదు. ఈ నెల ఐదో తేదీన నిర్వహించాలనుకున్న అపెక్స్ కౌన్సిల్ సమావేశం.. కేసీఆర్ విజ్ఞప్తితో వాయిదా పడింది. అయినప్పటికీ పట్టు వదలకుండా ఇరవై ఐదో తేదీన సమావేశాన్ని ఖరారు చేశారు. ఇద్దరు ముఖ్యమంత్రులు ఇక హాజరు కాక తప్పదనుకుంటున్న సమయంలో… మరో అడ్డంకి వచ్చి పడింది. కేంద్ర జలశక్తి మంత్రి గజేంద్ర సింగ్ షెకావత్‌కు కరోనా పాజిటివ్‌గా నిర్ధారణ అయింది. ఈ విషయాన్ని ఆయన ట్విట్టర్ ద్వారా వెల్లడించారు. దీంతో ఇరవై ఐదో తేదీన జరగాల్సిన అపెక్స్ కౌన్సిల్ భేటీ నిర్వహణ ప్రశ్నార్థకంగా మారింది.
అపెక్స్ కౌన్సిల్ భేటీ అంటే.. తెలుగు రాష్ట్రాల ముఖ్యమంత్రులతో పాటు…కేంద్ర జలశక్తి మంత్రి కూడా ఖచ్చితంగా హాజరు కావాల్సి ఉంటుంది. ఆయనే తెలుగు రాష్ట్రాల మధ్య ఉన్న పంచాయతిని తీర్చాల్సి ఉంటుంది. రెండు రాష్ట్రాలు పోటాపోటీగా ఒకరిపై ఒకరు ఫిర్యాదులు చేసుకుంటున్నాయి. ఒకరి ప్రాజెక్టులు అక్రమం అంటే..మరొకరి ప్రాజెక్టులు అక్రమం అని వాదిస్తున్నాయి. అయితే రెండు రాష్ట్రాలూ… ప్రాజెక్టుల డీపీఆర్‌లను ఇవ్వడం లేదు. అదే సమయంలో.. పోతిరెడ్డి పాడు నుంచి రోజుకు మూడు టీఎంసీల నీటిని తరలించేందుకు కొత్తప్రాజెక్టుకు.. ఏపీ టెండర్లు ఖరారు చేయడానికి రంగం సిద్ధం చేసుకుంది.
అయితే..ఈ టెండర్లపై తెలంగాణ సర్కార్ సుప్రీంకోర్టులో పిటీషన్ దాఖలు చేసింది. సాధారణంగా అపెక్స్ కౌన్సిల్ సమావేశం ఇరు రాష్ట్రాల ముఖ్యమంత్రుల కోరిక మేరకు నిర్వహించాల్సి ఉంటుంది. అటువంటి విజ్ఞప్తులు ఏవీ లేకుండానే నిర్వహిస్తున్న అపెక్స్ కౌన్సిల్ సమావేశానికి ఇరు రాష్ట్రాల ముఖ్యమంత్రులు ఒకరిపై ఒకరు ఆరోపణలు చేసుకునేందుకు, డిపిఆర్ లు అనుమతి లేకుండా నిర్మిస్తున్న ప్రాజెక్ట్ ల వివరాలను పొందుపరుస్తూ నివేదికలు సిద్దం చేశారు. ఇప్పుడు గజేంద్ర సింగ్‌కు కరోనా సోకడం వల్ల సమావేశ నిర్వహణపై ఉత్కంఠ ఏర్పడింది. ఆన్ లైన్‌లో జరిగే సమావేశం కాబట్టి.. ఇబ్బంది ఉండదన్న చర్చ కూడా అధికారవర్గాల్లో నడుస్తోంది.
