‘హిట్’ ల‌క్ష‌ణాలున్నాయ్‌!

థ్రిల్ల‌ర్ ఎప్పుడూ ఆక‌ర్షించే జోన‌రే. బ‌హుశా…. థ్రిల్ల‌ర్‌ని ఇష్ట‌ప‌డే వ‌ర్గం త‌క్కువ కావొచ్చు. కానీ.. ఓ మంచి థ్రిల్ల‌ర్ సినిమా వ‌స్తే – థియేట‌ర్లు నిండుతాయ‌న్న భ‌రోసా మాత్రం కావ‌ల్సినంత ఉంది. అందుకే ఈ జోన‌ర్‌ని ఎప్పుడూ ఎవ‌రూ వ‌ద‌ల‌డం లేదు. నిర్మాత‌గా నాని వ‌రుస‌గా రెండోసారీ థ్రిల్ల‌ర్ క‌థ‌నే ఎంచుకున్నాడు. అదే.. `హిట్‌`. విశ్వ‌క్‌సేన్ క‌థానాయ‌కుడిగా న‌టించిన ఈచిత్రం శుక్ర‌వారం విడుద‌ల కానుంది. హిట్ కి సంబంధించి టీజ‌ర్‌, ట్రైల‌ర్ ఎప్పుడో వ‌చ్చేశాయి. ఇప్పుడు 5 నిమిషాల నిడివి గ‌ల ఓ సీన్ కూడా బ‌య‌ట‌కు తీసుకొచ్చారు. క‌థానాయ‌కుడు ఓ శ‌వానికి సంబంధించిన అన్వేష‌ణ ఎలా చేశాడు? మిస్ట‌రీని ఎలా రాబ‌ట్టాడు అనే సీన్ అది. అందులో మిస్ట‌రీ గుట్టు పూర్తిగా విడ‌కుండానే క‌ట్ చెప్పేశాడు ద‌ర్శ‌కుడు. ఆ మిస్ట‌రీ ఏమిట‌న్న‌ది సినిమా చూస్తే గానీ అర్థం కాదు. మొత్తానికి జ‌నాల్ని థియేట‌ర్ల‌కు ర‌ప్పించ‌డానికి ఇది మంచి టెక్నిక్ అనుకోవాలి. ఈ 5 నిమిషాల ఎపిసోడ్‌లో టేకింగు, షాట్ డివిజ‌న్‌, బ్యాక్ గ్రౌండ్ స్కోర్‌… ఇవ‌న్నీ చూస్తే.. హిట్ ల‌క్ష‌ణాలు ఉన్న‌ట్టే క‌నిపిస్తున్నాయి. పూర్తిగా బొమ్మ ప‌డితే గానీ.. జాత‌కం అర్థం కాదు. చూద్దాం.. శుక్ర‌వారం రిపోర్ట్ ఎలా ఉంటుందో??