విదేశాలలో నల్లధనం వెనక్కి రప్పించే ప్రయత్నంలో మోడీ ప్రభుత్వం అనేక చర్యలు చేపట్టింది. అందులో భాగంగా విదేశాలలో నల్లధనం దాచుకొన్నవారు స్వచ్చందంగా ఆ వివరాలను బయటపెట్టి, దానిపై 30శాతం జరిమానా, మరో 30 శాతం పన్ను చెల్లించి శిక్ష పడకుండా తప్పించుకొనే వెసులుబాటు కల్పించింది. గతేడాది జూలై 1వ తేదీ నుండి ఈ ఏడాది సెప్టెంబర్ 30 వరకు ఇచ్చిన గడువులో మొత్తం 638 మంది స్వచ్చందంగా తమ నల్లధనం వివరాలను ఆదాయపన్ను శాఖ అధికారులకు సమర్పించి మొత్తం రూ.3, 770 కోట్లు చెల్లించారు.
ఆ మరునాడు కేంద్ర ఆర్ధిక శాఖ మంత్రి అరుణ్ జైట్లీ మీడియాతో మాట్లాడుతూ, ప్రభుత్వం ఇచ్చిన అవకాశాన్ని వినియోగించుకొని తమ నల్లధనం వివరాలను బయటపెట్టి పన్నులు, జరిమానాలు చెల్లించినవారందరూ ఇకపై నిశ్చింతగా నిద్ర పోవచ్చును. కానీ మిగిలినవారు మాత్రం మా ప్రభుత్వం చేపట్టబోయే కటినమయిన చర్యలు ఎదుర్కోవడానికి సిద్దంగా ఉండక తప్పదు. ఇక నుండి నల్లధనం దాచినవారికి 10 ఏళ్ల జైలు శిక్ష దానితో బాటు వారు దాచిన నల్లధనంపై 120 శాతం జరిమానా విధిస్తారు.
గడువు తేదీ ముగిసిన వెంటనే ఆదాయపన్ను శాఖ అధికారులు నల్లధనం దాచినవారిపై దాడులు నిర్వహించడం మొదలుపెట్టారు. ఇటీవల కోలీవుడ్ హీరో విజయ్, హీరోయిన్లు సమంత, నయనతారల ఇళ్ళపై ఆదాయపన్ను శాఖ అధికారులు జరిపిన దాడుల్లో చాలా భారీ మొత్తం స్వాధీనం చేసుకొన్నట్లు వార్తలు వచ్చేయి. రాజస్థాన్ రాష్ట్రంలో కిషన్ ఘడ్ అనే పట్టణంలో ఆర్.కె.మార్బిల్స్ సంస్థకు చెందిన ఒక కార్యాలయంపై ఆదాయపన్ను శాఖ అధికారులు ఇటీవల జరిపిన దాడుల్లో ఏకంగా రూ.13,000 కోట్లు నగదు పట్టుబడింది. ఒక గది నిండా నోట్లకట్టలు నీటుగా పేర్చి ఉండటం చూసి ఆదాయపన్ను శాఖ అధికారులు సైతం షాక్ అయ్యారు. వాటిలో భారత కరెన్సీ మాత్రమే కాకుండా అమెరికా డాలర్ల కట్టలు కూడా ఉన్నాయి. అధికారులు ఆ సొమ్మును స్వాధీనం చేసుకొని ఆ సంస్థ యజమానులను, అధికారులను పోలీసులకి అప్పగించారు. ప్రభుత్వం సుమారు ఏడాది పాటు సమయం ఇస్తే కేవలం రూ. 3770 మాత్రమే వసూలు కాగా, ఆదాయపన్నుశాఖ అధికారులు జరిపిన ఒకే ఒక దాడిలో ఏకంగా రూ. 13, 000 కోట్లు పట్టుబడటం విశేషం.
