తనపై దాడి చేస్తున్న అమెరికా, ఇజ్రాయెల్‌లపై మాత్రమే కాదు.. మొత్తం గల్ఫ్ ను నాశనం చేయాలని ఇరాన్ అనుకుంటోంది. ముఖ్యంగా అమెరికాతో మిత్రుత్వం ఉన్న గల్ఫ్ దేశాలను నాశనం చేయాలనుకుంటోంది. అందుకే గల్ఫ్ ఆర్థిక ఆయువు పట్టు అయిన ప్రాంతాలపై మిస్సైళ్లు, డ్రోన్లతో దాడులు చేస్తోంది. ఇప్పుడు గల్ఫ్ లో అంతా గందరగోళంగా ఉంది. అత్యంత పటిష్టమైన ఆర్థిక వ్యవస్థగా ఎదుగుతున్న దుబాయ్ లో అయితే పానిక్ చాలా పెద్ద స్థాయిలో ఉంది.

గ్లోబల్ సిటీగా ఎదిగిన దుబాయ్

దుబాయ్ తన ఆర్థిక వ్యవస్థను చమురుపై ఆధారపడకుండా పర్యాటక, రియల్ ఎస్టేట్ , టెక్నాలజీ రంగాల వైపు మళ్లించడంలో గొప్ప విజయం సాధించింది. దుబాయ్ పాలకుడు షేక్ మొహమ్మద్ బిన్ రషీద్ అల్ మక్తూమ్ విజన్ ప్రకారం, ఈ నగరం ప్రపంచంలోని టాప్ 3 ఆర్థిక కేంద్రాలలో ఒకటిగా ఎదగడమే లక్ష్యంగా పెట్టుకుంది. దీనివల్ల 2026 నాటికి ప్రపంచవ్యాప్తంగా ఉన్న వేలాది మంది కుబేరులు తమ కుటుంబాలతో సహా ఇక్కడ స్థిరపడ్డారు. కేవలం విలాసం కోసమే కాకుండా, పన్ను రాయితీలు, అద్భుతమైన మౌలిక సదుపాయాల కారణంగా ఇది అంతర్జాతీయ వ్యాపారాలకు ప్రధాన చిరునామాగా మారింది.

మిస్సైళ్ల దాడులతో భయం భయం

ప్రస్తుతం ఇరాన్-ఇజ్రాయెల్ మధ్య తలెత్తిన ఉద్రిక్తతలు, దుబాయ్ పై క్షిపణి దాడులు ఈ సురక్షిత స్వర్గం ప్రతిష్టను తీవ్రంగా సవాలు చేస్తున్నాయి. పామ్ జుమేరా వంటి ఐకానిక్ ప్రాంతాల వద్ద భద్రతా పరమైన ఆందోళనలు తలెత్తడం వల్ల, అక్కడ నివసిస్తున్న సంపన్నులలో అభద్రతా భావం మొదలైంది. ఏ దేశమైనా ఆర్థికంగా ఎంత ఎదిగినా, ఆ ప్రాంతంలో శాంతి లేకపోతే పెట్టుబడులు ఒక్క క్షణంలో వెనక్కి వెళ్లిపోయే ప్రమాదం ఉంటుంది. ప్రస్తుతం దుబాయ్ ఎదుర్కొంటున్న అతిపెద్ద సవాలు కూడా. తన భౌగోళిక రాజకీయ తటస్థతను కాపాడుకుంటూ, ఇన్వెస్టర్లలో నమ్మకాన్ని పునరుద్ధరించడం. అది అంత తేలిక కాదు.

దుబాయ్ మొత్తం ఎక్కడిదక్కడే

ఇరాన్ దాడుల వల్ల ప్రపంచంలోనే అత్యంత రద్దీగా ఉండే దుబాయ్ విమానాశ్రయంలో విమానాల రద్దు , గగనతల మూసివేత వల్ల రోజుకు కోట్లాది డాలర్ల నష్టం వాటిల్లుతోంది. దుబాయ్ ఆర్థిక వ్యవస్థలో పర్యాటక రంగం వాటా చాలా కీలకం, యుద్ధ భయంతో పర్యాటకులు రాకను నిలిపివేస్తే, అది హోటల్ , రిటైల్ రంగాలపై పెను ప్రభావం చూపుతుంది. గతంలో ఎన్నడూ లేని విధంగా ఎత్తయిన భవనాల నుంచి ప్రజలను ఖాళీ చేయించడం వంటి వార్తలు అంతర్జాతీయ మీడియాలో రావడంతో, గ్లోబల్ ఇన్వెస్టర్ల మనసులో రెండో ఆలోచనలు వస్తాయి. ఇతర దేశాలతో పోలిస్తే దుబాయ్ కోలుకునే సామర్థ్యం ఎక్కువే అయినప్పటికీ, గల్ఫ్ ప్రాంతంలో సుదీర్ఘ కాలం అస్థిరత కొనసాగితే మాత్రం, ఆయిల్-రహిత ఆర్థిక వ్యవస్థను నిర్మించాలనే దుబాయ్ కల నెరవేరడం అంత తేలిక కాదు.