‘పుష్ప’ విడుదలకు ఇంకా మూడు రోజులే వుంది. నిన్న ప్రీ రిలీజ్ ఈవెంట్ గ్రాండ్ గానే జరిగింది. సుకుమార్, దేవిశ్రీ ప్రసాద్ ఈవెంట్ లేరు. అది కొంత లోటు. దేవిశ్రీ వుంటే ఆ హంగామా వేరుగా వుండేది. కానీ ఇంకా మిక్సింగ్ పని పూర్తి కాలేదు. దీంతో సుక్కు, దేవి ముంబాయ్ లో వుండిపోవాల్సి వచ్చింది. ఇంకా మూడు రోజులు అంటే.. ఎక్కువ సమయం లేదు. కౌంట్ డౌన్ గంటల్లోకి వచ్చేసిందనే చెప్పాలి. అయితే సమయం ఇంత దగ్గర పడుతున్నా పుష్ప యూనిట్ లో ప్రమోషన్స్ వేడి కనిపించడం లేదు. ప్రి రిలీజ్ ఈవెంట్ టాలీవుడ్ వరకూ ఓకే. కానీ పుష్ప పాన్ ఇండియా సినిమా. కనీసం ముంబాయ్, బెంగళూరు. చెన్నయ్ వేదికలపై పుష్ప ప్రచారం జరగాలి. కానీ అది కనిపించడంలేదు. ఆర్ఆర్ఆర్ విడుదలకు ఇంకా సమయం వుంది. అయితే ఈ గ్యాప్ లోనే ఆర్ఆర్ఆర్ దేశాన్ని చుట్టేసింది. కానీ పుష్ప టీంలో చలనం కనిపించడం.
ఇన్నర్ టాక్ ఏమిటంటే .. నిర్మాతలకు ప్రమోషన్ చేయాలనే వుందట. కానీ బన్నీలో ఆసక్తి కనిపించడం లేదు. ప్రమోషన్స్ పై బన్నీ అభిప్రాయం మరోలా వుంది. సినిమా అద్భుతంగా వచ్చిందని, మౌత్ టాక్ జనాలని థియేటర్ లోకి రప్పిస్తుందనేది బన్నీ నమ్మకం. అందుకే బన్నీ కి మాంచి ఫ్యాన్ ఫాలోయింగ్ వున్న మలయాళంలో కూడా పుష్పని ఎక్కువగా ప్రమోట్ చేయడం లేదు. పుష్ప ని సరిగ్గా ప్రమోట్ చేయడం లేదనే అభిప్రాయాన్ని దర్శకుడు రాజమౌళి కూడా ఇన్ డైరెక్ట్ గా నిన్న ప్రి రిలీజ్ ఈవెంట్ లో చెప్పారు. ”బన్నీ ఇది చాలా గొప్ప సినిమా. ముంబాయ్ లో పుష్ప గురించి అడుగుతున్నారు. నీవు అక్కడ కూడా దిన్ని ప్రమోట్ చేయాలి” అని చెప్పారు రాజమౌళి. పుష్ప కి పాన్ ఇండియా ప్రమోషన్ అవసరం అనే సంగతి రాజమౌళి గుర్తించారంటే .. పాన్ ఇండియా ప్రమోషన్ లో పుష్ప ఎంత నెమ్మదిగా వుందో అర్ధం చేసుకోవచ్చు. అయితే ప్రమోషన్స్ కి నిర్మాతలు రెడీగానే వున్నారు. కానీ బన్నీ స్ట్రాటజీ కాస్త వేరుగా వుంది. మరి బన్నీ వ్యూహం ఎంత వరకు కరెక్టో చూడాలి.
