ఉమ్మడి కరీంనగర్ జిల్లా ఒకప్పుడు కాంగ్రెస్‌కు కంచుకోట. అయితే 2014 ఎన్నికల్లో సీన్ మారిపోయింది. కారు పార్టీ జోరు చూపించింది. అయితే అదే దూకుడు ఇప్పుడు ఉంటుందా అంటే మాత్రం అనుమానమేనన్న పరిస్థితి కనిపిస్తోంది. అసెంబ్లీ రద్దు చేసేవరకు జిల్లాలో టీఆర్ఎస్‌కు ఎదురులేదన్న భావన ఉండేది. ఆ తరువాత వేగంగా మారుతున్న పరిణామాలతో లెక్కలు మారిపోతున్నాయి. కరీంనగర్ తాజా మాజీ ఎమ్మెల్యే, టీఆర్ఎస్ అభ్యర్ధి గంగుల కమలాకర్ ప్రచారంలో ముందు ఉన్నారు. గత ఎన్నికల్లో టీడీపీతో పొత్తులో భాగంగా.. కరీంగనగర్‌లో బీజేపీ పోటీచేసింది. రెండో స్థానంలో నిలిచింది. ఈ సారి టీడీపీతో పొత్తులో భాగంగా కాంగ్రెస్ పోటీ చేస్తోంది. కాంగ్రెస్ తరపున పొన్నం ప్రభాకర్ రంగంలో ఉండటంతో.. రేస్ ఉత్కంఠఛగా మారింది. పొన్నం ప్రభాకర్ టీఆర్ఎస్ అభ్యర్థికి ధీటుగా రెండు నెలలుగా క్షేత్రస్థాయిలో ఇంటింటికి తిరుగుతున్నారు. మూడు పార్టీల నుంచి గట్టి అభ్యర్ధులే బరిలో ఉండటంతో ఇక్కడ త్రిముఖ పోరు కనిపిస్తుంది.
హుజూరాబాద్ నియోజకవర్గం నుంచి ఈటల రాజేందర్ పోటీ చేస్తున్నారు. కమలాపూర్, హుజురాబాద్ నియోజకవర్గాల నుంచి అయిదుసార్లు శాసనసభ్యుడిగా ఎన్నికయ్యారు. ఆర్ధికమంత్రిగా నియోజకవర్గానికి వేలకోట్ల రూపాయలు మంజూరు చేశారన్న ఇమేజ్ ఉంది. మహాకూటమి తరుపున కాంగ్రెస్ చీఫ్ ఉత్తమ్ బంధువు పాడి కౌశిక్ రెడ్డి బరిలో ఉన్నారు. బీజేపీ నుంచి పుప్పాల రఘు పోటీ చేస్తున్నారు. ప్రధానంగా ఈటల, కౌశిక్ రెడ్డి మధ్యనే పోటీ ఉంది. హుజూరాబాద్, కమలాపూర్ మండలాల్లో టీఆర్ఎస్ బలం ఉంది. వీణవంక, జమ్మికుంట మండలాలు కాంగ్రెస్‌కు మద్దతుగా నిలిచే అవకాశం ఉంది.
చొప్పదండి నియోజకవర్గంలో కేసీఆర్ చివరికి వరకూ టిక్కెట్ ఖరారు చేయలేదు. సిట్టింగ్ ఎమ్మెల్యే బొడిగే శోభకు టిక్కెట్ నిరాకరించడానికి ఆమె ప్రత్యామ్నాయం వెదుక్కునే వరూక ఎదురు చూశారు. ఆఖరి నిమిషం వరకు టిక్కెట్ ఇవ్వకపోవడంతో ఆమె బీజేపీ తీర్ధం పుచ్చుకున్నారు. ఆ తర్వతా సుంకె రవిశంకర్ కు టిక్కెట్ ప్రకటించారు. అధికారపార్టీకి పడాల్సిన ఓట్లు శోభ చీల్చే అవకాశం స్పష్టంగా కనిపిస్తుంది. ఈ పరిణామాలు తనకు కలిసొస్తాయనే ఆశతో ఉన్నారు కూటమి అభ్యర్ధి మేడిపల్లి సత్యం. కాంగ్రెస్ వర్కింగ్ ప్రెసిడెంట్ రేవంత్ రెడ్డి పట్టుబట్టి మేడిపల్లి సత్యంకు టిక్కెట్ ఇప్పించారు. గెలిపించే బాధ్యతలు తీసుకున్నారు. ప్రభావం చూపించే కొంత మంది నేతల్ని పార్టీలో చేర్చుకుంటున్నారు. ఇక్కడ టీఆర్ఎస్, కాంగ్రెస్, బీజేపీ మధ్య హోరాహోరీ పోరు జరుగుతోంది.
మానకొండూరు నియోజకవర్గంలో పరిస్థితి చిత్రంగా ఉంది. ఇక్కడ టీఆర్ఎస్ బలంగా ఉన్నా… అభ్యర్ధిపై సొంత పార్టీలోనే తీవ్ర వ్యతిరేకత కనిపిస్తోంది. టిక్కెట్లు ప్రకటించిన రోజు నుంచి సిట్టింగ్ ఎమ్మెల్యే రసమయి బాలకిషన్ కు వ్యతిరేకంగా నిరసన స్వరాలు వినిపించాయి. అవి క్రమంగా పెరుగుతూనే ఉన్నాయి. రసమయి స్థానికుడు కాదని, ప్రజాప్రతినిధిగా మెప్పించలేకపోయారని సొంతపార్టీలోనే ఓ వర్గం వ్యతిరేకంగా పనిచేస్తుంది. ఈ పరిణామాలను క్యాష్ చేసుకోవడానికి కూటమి అభ్యర్ధి ఆరేపల్లి మోహన్ పక్కా వ్యూహంతో ముందుకెళుతున్నారు. బీజేపీ నుంచి గడ్డం నాగరాజు బరిలో ఉన్నా… ప్రధాన పోటీ మాత్రం టీఆర్ఎస్, కూటమి అభ్యర్ధుల మధ్యే కనిపిస్తుంది. హుస్నాబాద్ లో టీఆర్ఎస్ అభ్యర్ధిగా సిట్టింగ్ ఎమ్మెల్యే వొడితల సతీష్ బరిలో ఉండగా…, కూటమి తరపున సీపీఐ రాష్ట్ర కార్యదర్శి చాడా వెంకట్రెడ్డి పోటీ చేస్తున్నారు. ఇతర పార్టీలతో పాటు రెబల్స్ కూడా బరిలో ఉన్నా… ప్రధాన పోటీ సతీష్, చాడా మధ్యే జరగనుంది. అభివృద్ధి నినాదం గట్టెక్కిస్తుందని సతీష్ నమ్ముతుంటే…, సొంత క్యాడర్తో పాటు కాంగ్రెస్, టీడీపీ ఓట్లు గెలిపిస్తాయనే ధీమాతో ఉన్నారు చాడా వెంకట్రెడ్డి.
