కర్ణాటకంలో.. భారతీయ జనతా పార్టీ ఇప్పుడు తెర ముందు పాత్ర పోషించడానికి రెడీ అయింది. ఇప్పటి వరకూ.. కలసి వచ్చే ఎమ్మెల్యేలందర్నీ క్యాంపునకు తీసుకుపోయిన ఆ పార్టీ… ఇప్పుడు… కుమారస్వామి రాజీనామాకు పట్టుబట్టాలని నిర్ణయించుకుంది. రాజీనామా చేస్తున్న రెబల్ ఎమ్మెల్యేలు.. నేరుగా ప్రత్యేక విమానాల్లో… ముంబైకి వెళ్తున్నారు. అక్కడ్నుంచి ఎక్కడికి వెళ్తున్నారో కానీ… వారందర్నీ కలిపి ఉంచడానికి ఓ నెట్‌వర్క్‌నే ఏర్పాటు చేశారు. అయితే బీజేపీ మాత్రం… ఆ క్యాంపుల గురించి తమకు తెలియదంటోంది. అసలు ఆ ఎమ్మెల్యేల రాజీనామాలతో సంబంధం లేదంటోంది. అంతేనా..ఆ ఎమ్మెల్యేలు కూడా అదే చెబుతున్నారు. తమ వెనుక బీజేపీ లేదంటున్నారు. తెర వెనుక రాజకీయాన్ని పక్కన పెడితే.. తెర ముందు మాత్రం… బీజేపీ సత్యాగ్రహాన్ని ప్రారంభించాలని నిర్ణయించింది. సీఎం కుమారస్వామి ప్రజా మద్దతు కోల్పోయారని కర్ణాటక బీజేఎల్పీ ఆరోపించింది. ఆయన రాజీనామా కోరుతూ ఉద్యమం చేయాలని యడ్యూరప్ప నిర్ణయించారు.
ప్రభుత్వాన్ని పడగొట్టేందుకు బీజేపీ, ప్రభుత్వాన్ని కాపాడుకునేందుకు కాంగ్రెస్ చెరో చోట క్యాంపు రాజకీయాలు నిర్వహిస్తున్నాయి. ముంబైలో ఉన్న కాంగ్రెస్ రెబెల్ ఎమ్మెల్యేలను గోవా తీసుకెళ్లేందుకు బీజేపీ అధిష్టానం ప్రయత్నించింది. పుణె తీసుకెళ్లి అక్కడ నుంచి గోవా తీసుకెళ్లాలనుకుంది. అయితే చివరిలో ప్లాన్ మార్చుకుంది. మళ్లీ ముంబైలోనే ఒక హోటల్లో ఉంచింది. జేడీఎస్ కూడా ముందు జాగ్రత్త చర్యగా తమ ఎమ్మెల్యేలను రిసార్ట్‌కు తరలించింది. సీఎం కుమారస్వామి ఎప్పటికప్పుడు వారితో టచ్‌లో ఉంటూ ఎమ్మెల్యేలు చేజారి పోకుండా చూసుకుంటున్నారు. మంత్రి పదవులు ఇవ్వనందునే తాము బైటకురావాల్సి వచ్చిందని కొందరు ఎమ్మెల్యేలు అంటున్నారు. వారి కోసం మంత్రి పదవుల్ని ఖాళీ చేసి పెట్టారు కుమారస్వామి.
స్పీకర్ వెంటనే చర్య తీసుకునే అవకాశం లేకపోవడంతో ఎవరు ఎటు పోతారో చెప్పలేని పరిస్థితి నెలకొంది. రాజీనామా చేసిన ఎమ్మెల్యేలందరితో 12 నుంచి 15వ తేదీ వరకు మాట్లాడాలని స్పీకర్ నిర్ణయించుకున్నారు. రాజీనామా చేసిన వారందిరినీ వెంటనే పార్టీ ఫిరాయింపుల చట్టం కింద అనర్హులుగా ప్రకటించాలని కాంగ్రెస్ డిమాండ్ చేస్తోంది. ఆరేళ్ల పాటు పోటీ చేయకుండా నిషేధం విధించాలని కోరుతోంది. మరో వైపు .. గవర్నర్ ఏం చేయబోతున్నారన్నది ఆసక్తికరంగా మారింది. ఆయన కుమారస్వామిని బలనిరూపణ చేసుకోమని కోరే అవకాశం ఉందన్న ప్రచారం జరుగుతోంది.
